వివాదాలతో సహవాసం చేసే ఫిలిప్పీన్స్ అధ్యక్షుడు రోడ్రిగో దుతర్తే అత్యాచారాలపై సంచలన వ్యాఖ్యలు చేశాడు. అందమైన అమ్మాయిలు, మహిళలు ఉన్నంతవరకూ అత్యాచారాలు తగ్గవని వ్యాఖ్యానించాడు. రోడ్రిగో సొంత పట్టణం డవావోలో ఇటీవలి కాలంలో అత్యాచారాలు పెరిగాయన్న నివేదికపై ఆయన దుతర్తే ఈ మేరకు స్పందించాడు. దీంతో ఈ వ్యాఖ్యలపై అక్కడి మహిళా సంఘాలు దుమ్మెత్తి పోస్తున్నాయి.మనీలాలో గురువారం జరిగిన ఓ కార్యక్రమంలో దుతర్తే మాట్లాడుతూ..‘డవావో పట్టణంలో అత్యాచారాలు పెరిగాయని అధికారులు చెబుతున్నారు. అందమైన యువతులు, మహిళలు ఎక్కువయ్యే కొద్దీ అత్యాచారాలు పెరుగుతూనే ఉంటాయి’ అని వ్యాఖ్యానించాడు. అంతటితో ఆగకుండా ‘పురుషుడు కోరగానే ఏ మహిళ అయినా శృంగారానికి ఒప్పకుంటుందా? ఒప్పుకోదు.  హా..హా..హా.. అందుకే అత్యాచారాలు జరుగుతున్నాయి’ అని చెత్త వ్యాఖ్యలు చేశాడు.రోడ్రిగో దుతర్తే ఇలాంటి అసభ్యకరమైన వ్యాఖ్యలు చేయడం ఇదే తొలిసారి కాదు. 2017లో ఓ సారి దుతర్తే మాట్లాడుతూ.. చిన్నారులపై లైంగిక దాడులను తాను సహించబోననీ, కానీ విశ్వ సుందరి పోటీల్లో నెగ్గినవారిపై రేప్ జరిగితే తనకేం అభ్యంతరం లేదని వ్యాఖ్యానించాడు. అంతకుముందు ఏడాది ఓ సమావేశంలో సైనికులను ఉద్దేశించి మాట్లాడుతూ.. ‘మార్షల్ లా సందర్భంగా మీరు ముగ్గురిని రేప్ చేసిన ఫర్వాలేదు. నేను చూసుకుంటాను’ అని చెత్త వ్యాఖ్యలు చేశాడు.