తెలంగాణ రాష్ట్రమంతటా ఇప్పుడు ఒకటే చర్చ.. ప్రగతి నివేదన సభ ఏర్పాట్లు, సీఎం కేసీఆర్ కొత్తగా ఏం వరాలు ప్రకటిస్తారో అనే ఆసక్తి. టీఆర్‌ఎస్ సర్కార్ ప్రతిష్టాత్మకంగా తీసుకున్న ప్రగతి నివేదన సభకు ఊర్లకు ఊర్లు తరలివెళ్తున్నాయి. రైతుల, కార్యకర్తలు, మహిళలూ.. అందరూ.. హైదరాబాద్ బాటపట్టారు! గులాబీ దళపతి కేసీఆర్ ఈ సభ ద్వారా ఎన్నికల సమరభేరీ మోగించనున్నట్లు సంకేతాలు వస్తుండటంతో రాజకీయంగా వేడి పుట్టింది. తమ పాలనలో తెలంగాణలో జరిగిన అభివృద్ధి గురించి ఈ సభ ద్వారా ప్రజలకు బలంగా చాటిచెప్పాలని కేసీఆర్ భావిస్తున్నారు. దీంతో టీఆర్‌ఎస్ పార్టీ ‘ప్రగతి నివేదన’ సభను ప్రతిష్టాత్మకంగా తీసుకుంది. సభను విజయవంతం చేయడంపై పార్టీ శ్రేణులు పూర్తిగా దృష్టి సారించాయి. సభ ఇబ్రహీంపట్నం నియోజకవర్గంలో జరుగుతుండటంతో స్థానిక టీఆర్‌ఎస్ నాయకులు నిర్విరామంగా ఏర్పాట్లలో మునిగిపోయారు. ఈ నేపథ్యంలో పార్టీ రాష్ట్ర నాయకులు కంచర్ల చంద్రశేఖర్‌ రెడ్డి ప్రగతి నివేదిక సభను విజయవంతం చేయడానికి చేస్తున్న వివిధ కార్యక్రమాలను వివరించారు. అబ్దుల్లాపూర్‌మెట్ మండలంలోనూ, వివిధ గ్రామాల్లోనూ సభ విజయవంతం చేయడానికి విస్తృతంగా ప్రచారం నిర్వహించినట్లు చంద్రశేఖర్‌ రెడ్డి తెలిపారు. అబ్దుల్లాపూర్‌మెట్, జేఎన్‌ఆర్‌యూ తదితర అనేక కాలనీల్లో ఇంటింటి ప్రచారం నిర్వహించామని, జనసమీకరణ ముమ్మరంగా చేస్తున్నామని ఆయన తెలిపారు. సభా ప్రాంగణంలో మొత్తం 15000 ఎల్‌ఈడీ, హాలోజన్‌ దీపాలను బిగిస్తున్నామని, వీటి కోసం 300 టవర్లు, 600 స్తంభాలు ఏర్పాటు చేస్తున్నామని చంద్రశేఖర్ రెడ్డి తెలిపారు. విద్యుత్తు సరఫరా కోసం మూడు విద్యుత్తు ఉపకేంద్రాలు ఏర్పాటు చేసినట్లు తెలిపారు. ప్రత్యామ్నాయంగా మరో 200 జనరేటర్లు సిద్ధం చేసినట్లు తెలిపారు. 50 లక్షల చదరపు అడుగుల మేర గ్రీన్‌ కార్పెట్‌ వేస్తున్నామని చెప్పారు. రైతుల ట్రాక్టర్ల కోసం పార్కింగ్‌ ప్రదేశాల్లో ప్రత్యేకంగా ఏర్పాట్లు చేస్తున్నామని చంద్రశేఖర్ రెడ్డి తెలిపారు. బోర్లు, ఇతర సదుపాయాలను కల్పిస్తున్నామని చెప్పారు. జేసీబీలు, రోడ్డు రోలర్లు, బుల్డోజర్లతో రేయింబవళ్లు పనులు కొనసాగుతున్నాయని తెలిపారు. ఏర్పాట్లన్నీ దాదాపు పూర్తయ్యాయని 30 లక్షల మంది వచ్చినా ఇబ్బందిలేదని, సభకు వచ్చి క్షేమంగా ఇంటికి తిరిగెళ్లేలా అన్ని ఏర్పాట్లు చేశామని ఆయన తెలిపారు. కొంగరకలాన్ వేదికగా నిర్వహిస్తున్న ప్రగతి నివేదన సభలో 4 సంవత్సరాల్లో టీఆర్ఎస్ ప్రభుత్వం చేపట్టిన ప్రజా సంక్షేమ కార్యక్రమాలను సీఎం కేసీఆర్ ప్రజలకు వివరించనున్నారు. అర కిలోమీటర్ దూరంలో ఉన్నవారు కూడా సభను తిలకించేందుకు వీలుగా 50 భారీ ఎల్ఈడీ తెరలను అమరుస్తున్నారు. విద్యుత్ ట్రాన్స్ ఫార్మర్లు ఏర్పాట్లు, బారికేడ్ల నిర్మాణం పనులు పూర్తయ్యాయి. హెలీప్యాడ్‌తో పాటు మొబైల్ ఫోన్ సిగ్నల్ టవర్లను ఏర్పాటు చేశారు. ఎమ్మెల్యే రసమయి బాలక్రిష్ణ ఆధ్వర్యంలో సాంస్కృతిక కార్యక్రమాలు కార్యకర్తల్లో ఉత్సాహం నింపనున్నాయి. అలాగే టీఆర్ఎస్ పార్టీ చరిత్రను తెలిపే ఫోటో ఎగ్జిబిషన్ కూడా ఏర్పాటు చేస్తున్నారు. ప్రగతి నివేదన సభ నేపథ్యంలో హైదరాబాద్ నుంచి కొంగరకలాన్‌‌కు వచ్చే రహదారులన్నీ గులాబీమయంగా మారాయి. ఔటర్ రింగ్ రోడ్డు నుంచి సభాస్థలికి 15 రోడ్లతో అనుసంధానం చేశారు. సభాస్థలి ప్రాంతంలో మల్లారెడ్డి వైద్య కళాశాల, నారాయణ వైద్య కళాశాల ఆధ్వర్యంలో ఏడు వైద్య శిబిరాలను ఏర్పాటు చేసి 30 అంబులెన్సులను సిద్ధంగా ఉంచనున్నారు. 100 మంది వైద్యులు, 150 మంది నర్సులతో పాటు పారా మెడికల్ సిబ్బందిని అందుబాటులో ఉంచనున్నారు. ఎమర్జెన్సీ వైద్యం అందించేందుకు నుంచి హైదరాబాద్‌లోని ఆస్పత్రులకు తరలించేందుకు వీలుగా 20 స్పెషల్ అంబులెన్స్ సిద్ధంగా ఉంచనున్నారు.