సెప్టెంబర్‌ 15 నుంచి దుబాయ్‌, అబుదాబి వేదికగా ప్రారంభం కానున్న ఆసియాకప్‌‌ కోసం సెలక్టర్లు జట్టును ప్రకటించారు. కోహ్లికి విశ్రాంతి ఇచ్చిన సెలక్టర్లు అతడి స్థానంలో రోహిత్‌ శర్మను కెప్టెన్‌గా ప్రకటించారు. ఓపెనర్ శిఖర్ ధావన్‌ వైస్ కెప్టెన్‌గా వ్యవహరించనున్నాడు. వచ్చే మూడు నెలల్లో వెస్టిండీస్, ఆస్ట్రేలియాలతో భారత్ టెస్టు సిరీస్‌లు ఆడనుంది. ఈ విషయాన్ని దృష్టిలో ఉంచుకొని సెలక్టర్లు కోహ్లికి విశ్రాంతి ఇచ్చారు. ఓపెనర్లుగా శిఖర్‌ ధావన్‌, రోహిత్‌ శర్మలుండగా వీరికి బ్యాకప్‌గా కేఎల్‌ రాహుల్ ఎంపికయ్యాడు. పరిస్థితిని బట్టి రాహుల్‌కు వన్‌డౌన్‌లో చాన్స్ దక్కవచ్చు. ఎంఎస్ ధోని రెగ్యులర్ కీపర్ కాగా, అదనపు వికెట్ కీపర్‌గా దినేష్ కార్తీక్‌‌‌ను ఎంపిక చేశారు. గాయం నుంచి కోలుకున్న భువనేశ్వర్‌ సహా బుమ్రా బౌలింగ్ బాధ్యతలు మోయనున్నారు. గత సీజన్లో సన్‌రైజర్స్ తరఫున ఆడిన రాజస్థాన్ పేసర్ ఖలీల్ అహ్మద్‌ తొలిసారి టీమిండియాకు ఎంపికయ్యాడు. ఇటీవల నిర్వహించిన యో-యో టెస్టులో పాసైన అంబటి రాయుడు.. ఇండియా ఏ తరఫున రాణించాడు. దీంతో ఆసియా కప్‌కి అతణ్ని ఎంపిక చేశారు. ఇండియా-బి తరఫున 306 పరుగులు చేయడంతోపాటు.. ఆ జట్టును విజేతగా నిలిపిన మనీశ్ పాండేకు కూడా భారత జట్టులోకి పిలుపు దక్కింది.