అమరావతి అందాలను ఆకాశమార్గం నుంచి చూడాలనుకునేవారికి శుభవార్త. ఏపీ పర్యాటక అభివృద్ధి సంస్థ హెలీకాప్టర్ జాయ్ రైడ్స్‌ను పర్యాటకుల కోసం అందుబాటులోకి తెస్తోంది.హెలికాప్టర్‌లో గగన విహారం చేయాలని ఉందా? అయితే, వెంటనే సిద్ధమైపోండి. ఆకాశమార్గంలో అమరావతి అందాలను చూపించేందుకు ఆంధ్రప్రదేశ్ పర్యాటక అభివృద్ధి సంస్థ (ఏపీటీడీసీ) హెలికాప్టర్ జాయ్ రైడ్స్‌ను ప్రారంభించేందుకు సన్నహాలు చేస్తోంది. మరో నెల రోజల్లో ఈ జాయ్ రైడ్స్ అందుబాటులోకి వస్తాయని అధికారులు తెలిపారు. ప్రయోగ దశలో ప్రతి శనివారం, ఆదివారం, పండుగల సమయంలో మాత్రమే ఈ హెలికాప్టర్ రైడ్స్ అందుబాటులో ఉంటాయని తెలిపారు. పర్యాటకుల నుంచి మంచి స్పందన వస్తే.. మిగతా రోజుల్లో కూడా ఈ రైడ్స్‌ను అందుబాటులోకి తెస్తామన్నారు. 10 నిమిషాల ఈ హెలికాప్టర్ రైడ్‌లో విజయవాడ నుంచి అమరావతి వరకు విహరించవచ్చు. టికెట్ విలువ సుమారు రూ.2వేలు నుంచి రూ.2500 వరకు ఉంటుందని అంచనా. పర్యాటక శాఖ గతంలో కూడా పర్యాటకుల కోసం హెలికాప్టర్ రైడ్‌లు నిర్వహించింది. మచిలిపట్నం బీచ్ ఫెస్టివల్ సందర్భంగా 8 నిమిషాల జర్నీకి రూ.2 వేలుతో మూడు రోజులపాటు హెలికాప్టర్ రైడ్స్ నిర్వహించారు. కృష్ణ పుష్కరాల్లోనూ హెలికాప్టర్ రైడ్స్‌కు పర్యాటకుల నుంచి మంచి స్పందన వచ్చింది. తెలంగాణం పర్యాటక శాఖ ఇప్పటికే హెలికాప్టర్ రైడ్స్‌ను అందుబాటులోకి తెచ్చింది. హైటెక్ సిటీ, ట్యాంక్‌బండ్ బుద్ద విగ్రహం, బిర్లామందిర్, చార్మినార్, అసెంబ్లీ తదితర ప్రాంతాల మీదుగా పర్యటించవచ్చు. ఇదేవిధంగా ఏపీటీడీసీ హెలీ జాయ్‌ రైడ్‌లో కూడా ఉండవల్లి గుహలు, ధ్యన బుద్ధ ఆలయం, కనక దుర్గ ఆలయం, పాత అమరావతి మీదుగా పర్యటించే అవకాశం లభించనుంది. ప్రభుత్వ ఆమోదం లభించగానే ఈ జాయ్‌రైడ్స్ మొదలవుతాయి.