ఇదివరకే ‘సన్నాఫ్ సత్యమూర్తి’లో అల్లు అర్జున్‌ సరసన నటించింది సమంత. ఆ సినిమా ఆకట్టుకుంది. ఇప్పుడు ఈ పెయిర్ మరోసారి రిపీట్ కాబోతోందని తెలుస్తోంది. విక్రమ్ కే కుమార్ దర్శకత్వంలో అల్లు అర్జున్ హీరోగా రూపొందే సినిమాలో సమంత హీరోయిన్‌గా నటించబోతోందని సమాచారం. ఇది వరకూ విక్రమ్ దర్శకత్వంలో కూడా సమంత నటించింది. ‘మనం’లో సమంతది ముఖ్యమైన పాత్ర అని చెప్పనక్కర్లేదు. ‘మనం’, ‘24’ సినిమాల తర్వాత కొంత కాలం కిందట ‘హలో’తో ఫెయిల్యూర్‌ను ఎదుర్కొన్నాడు విక్రమ్ కుమార్.  ఇతడి తర్వాతి సినిమా పట్టాలెక్కడానికి కాస్త సమయం పట్టింది. గతంలో ప్రతిపాదనలోకి వచ్చిన అల్లు అర్జున్ సినిమాతోనే విక్రమ్ కుమార్ రాబోతున్నాడు. ఇందులో తన సినిమా ‘మనం’ హీరోయిన్ సమంతనే తీసుకుంటున్నాడట. అలాగే ఈ సినిమాలో మరో హీరోయిన్ పాత్ర కూడా ఉండబోతోందని సమాచారం. అదెవరు..అనేది ఇంకా తెలియడం లేదు. పలు పేర్లను పరిశీలిస్తున్నారట. సమంత వరకూ మాత్రం ఓకే అయ్యిందని, త్వరలోనే అధికారిక ప్రకటన రాబోతోందని తెలుస్తోంది.