తెలంగాణ ఆపద్ధర్మ ముఖ్యమంత్రి కేసీఆర్‌పై ఆంధ్రప్రదేశ్‌ మంత్రి, టీడీపీ నేత నారా లోకేష్‌ తీవ్ర విమర్శలు చేశారు. ఓవైపు తెలుగువారంతా ఒక్కటేనని, ఒక్కటిగా కలిసుండాలని చెబుతూనే.. కేసీఆర్ జాగో బాగో అంటూ కామెంట్లు చేస్తున్నారని ఎద్దేవా చేశారు. తెలంగాణలో అధికార టీఆర్ఎస్ ముందస్తు ఎన్నికలకు వెళ్లినా ఏపీలోని చంద్రబాబు నాయుడు ప్రభుత్వం మాత్రం మీనమేషాలు లెక్కిస్తుందని విమర్శలు వెల్లువెత్తుతున్న నేపథ్యంలో మంత్రి లోకేష్ అమరావతిలో మీడియాతో మాట్లాడారు. ముందస్తుకు వెళ్తే ఈ అసెంబ్లీ ఎన్నికల్లో పార్టీకి ఘననీయంగా సీట్లు వస్తాయని, తద్వారా లోక్‌సభ ఎన్నికల్లోనూ టీఆర్ఎస్ పైచేయి సాధిస్తుందని భావించి కేసీఆర్ కీలక నిర్ణయంతో ముందుకు సాగుతున్నారు.‘టీఆర్‌ఎస్‌ పార్టీలో టీడీపీ నేతలు ఎంతమంది ఉన్నారో అందరికీ తెలుసు. కానీ జాగో బాగో అన్న తరహాలో కేసీఆర్ ముందస్తు ఎన్నికలకు వెళ్లడాన్ని ప్రజలు గుర్తించాలి. ఆంధ్రోళ్ల ఓట్లు వేయించుకుని గెలిచిన ఎమ్మెల్యేలను కేసీఆర్‌ తన పక్కన కూర్చోబెట్టుకున్నారు. ఎవరి సహకారం లేకుండానే ముందుకు సాగుతున్నట్లు చెప్పుకునే టీఆర్ఎస్.. ఆంధ్రోళ్ల ఓట్లు వేయించుకోకుండానే గ్రేటర్ హైదరాబాద్ మునిసిపల్ కార్పొరేషన్ (జీహెచ్‌ఎంసీ) పీఠాన్ని చేజిక్కించుకుందా అని’ కేసీఆర్‌ను ఏపీ మంత్రి లోకేష్ ప్రశ్నించారు. 2014 అసెంబ్లీ ఎన్నికల్లో టీడీపీ తరఫున గెలిచిన పలువురు ఎమ్మెల్యేలకు పార్టీ కండువా కప్పి టీఆర్ఎస్ లోకి ఆహ్వానించారని ఈ సందర్భంగా ఆయన గుర్తుచేశారు. కాగా, గత ఎన్నికల్లో టీడీపీ తరఫున గెలిచిన కూకట్‌పల్లి ఎమ్మెల్యే మాధవరం కృష్ణారావు, జూబ్లీహిల్స్‌ ఎమ్మెల్యే మాగంటి గోపీనాథ్, మరికొందరు నేతలు అధికార టీఆర్‌ఎస్‌ పార్టీలో చేరిన విషయం తెలిసిందే. శాననసభను దాదాపు 9 నెలల ముందుగానే రద్దుచేసిన కేసీఆర్ ముందస్తు ఎన్నికలకు వెళ్తున్నారు. ఈ క్రమంలో అదే రోజు 105 మంది అభ్యర్థుల జాబితాను ప్రకటించి కాంగ్రెస్, టీడీపీలను ఆశ్చర్యంలో ముంచెత్తారు కేసీఆర్. రాష్ట్రం సాధించుకున్నాక ఏర్పడ్డ తొలి ప్రభుత్వం పూర్తి కాలాన్ని కొనసాగించకుండానే ముందస్తుకు వెళ్లడం దేశ రాజకీయాల్లో చర్చనీయాంశంగా మారింది. ఫెడరల్ ఫ్రంట్ ఏర్పాటు చేసేందుకు జాతీయ స్థాయిలో మరికొన్ని పార్టీల అగ్రనేతలతో కేసీఆర్ ఇదివరకే చర్చలు జరిపారు.