పార్టీతో తెలుగుదేశం పొత్తు సూచనప్రాయంగా ఓకే అయినట్టుగా వార్తలు వస్తున్నాయి. తెలంగాణలో పొత్తులు తప్పవని టీడీపీ అధినేత చంద్రబాబు నాయుడు బహిరంగంగానే చాన్నాళ్లుగా వ్యాఖ్యానిస్తూ వస్తున్నారు. అయితే చివరకు తెలుగుదేశం పార్టీ కాంగ్రెస్‌తో పొత్తు పెట్టుకోవడం మాత్రం విచిత్రమే. ఎందుకంటే.. తెలుగుదేశం పార్టీ ఆవిర్భావం జరిగినదే కాంగ్రెస్ వ్యతిరేకత అనే పునాది మీద. దశాబ్దాల కాంగ్రెస్ పార్టీ పాలన మీద వ్యతిరేకతే ఆయుధంగా తెలుగుదేశం పార్టీ ఆవిర్భావంతోనే అధికారాన్ని సొంతం చేసుకుంది. ఆ తర్వాత జాతీయ స్థాయిలో కూడా తెలుగుదేశం పార్టీ కాంగ్రెస్ వ్యతిరేకి గానే నిలిచింది. ఎన్టీఆర్ హయాంలో అయినా, చంద్రబాబు నాయుడు చేతికి బాధ్యతలు వచ్చాకా అయినా కాంగ్రెస్ వ్యతిరేకంగానే నిలిచింది తెలుగుదేశం పార్టీ. అయితే.. రాష్ట్ర విభజన, ఇతర పరిణామాలు ఇప్పుడు కాంగ్రెస్‌తో తెలుగుదేశం పార్టీ పొత్తు పెట్టుకునేలా చేస్తున్నాయి. తెలుగుదేశం అధినేత కూడా కాంగ్రెస్‌తో స్నేహహస్తం చాస్తున్నారు. కర్ణాటక ముఖ్యమంత్రిగా కుమారస్వామి ప్రమాణ స్వీకారం సమయంలో సోనియా, రాహుల్‌లతో చాలా సన్నిహితంగా కనిపించారు చంద్రబాబు. ఇక కాంగ్రెస్, టీడీపీల మధ్యన తెలంగాణలో పొడుస్తున్న పొత్తు గురించి ఆసక్తిదాయకమైన వార్తలు వస్తున్నాయి. అసెంబ్లీ ఎన్నికల్లో కనీసం 30 సీట్లు కావాలనేది తెలుగుదేశం పార్టీ వాళ్లు కాంగ్రెస్ ముందు పెట్టిన ప్రతిపాదనగా తెలుస్తోంది. తెలంగాణలో తమ బలం పూర్తిగా తగ్గిపోలేదని.. కాబట్టి తమకు ఆ మాత్రం సీట్లు ఇవ్వాలని తెలుగుదేశం పార్టీ డిమాండ్ చేస్తోందట. అయితే కాంగ్రెస్ పార్టీ మాత్రం మరీ అన్ని సీట్లను ఇవ్వడానికి సిద్ధంగా లేదని వార్తలు వస్తున్నాయి. తెలుగుదేశం పార్టీతో బేరమాడి.. తక్కువ సీట్లను కేటాయిస్తూ పొత్తు కుదుర్చుకునే ఉద్దేశంతో ఉందట కాంగ్రెస్ పార్టీ. అంతిమంగా ఈ డీల్ ఎన్ని సీట్లకు ఓకేఅవుతుందో!