నటి ప్రియాంక చోప్రా తన సినిమా ‘భరత్’ నుంచి తప్పుకోవడంపై సల్మాన్ ఖాన్‌కు ఇంకా ఆగ్రహం తగ్గినట్టుగా కనిపించడం లేదు. హాలీవుడ్ సినిమాలో ఛాన్స్ దక్కడంతో ‘భరత్’ నుంచి తప్పుకుంది ప్రియాంక. ఆమె స్థానంలో సల్మాన్ ఖాన్ మరో హీరోయిన్‌ను ఎంపిక చేసుకున్నాడు. ఆ ఛాన్స్ కత్రినా కైఫ్‌కు దక్కింది. ప్రస్తుతం ఆ సినిమా షూటింగ్ కూడా జరుగుతోంది. ఆ సినిమాలో సల్లూ, కత్రినాలకు సంబంధించిన స్టిల్ కూడా ఇప్పటికే బయటకు వచ్చింది.ఇలాంటి నేపథ్యంలో కూడా ప్రియాంక ప్రస్తావన తీసుకొచ్చాడు సల్మాన్. ఈ హీరో ప్రియాంక తీరును తప్పు పట్టాడు. తన సినిమాలో ఛాన్స్ కోసం ప్రియాంక అనేక సార్లు కాల్ చేసిందని, తన చెల్లెలు అర్పితతో ఈ విషయంలో ఆమె ప్రాధేయపడిందని సల్మాన్ చెప్పాడు. అర్పితకు ప్రియాంక కనీసం వెయ్యి సార్లు కాల్ చేసి ఉంటుందని.. సల్మాన్ వ్యాఖ్యానించాడు. ఇలా ప్రాధేయపడి ‘భరత్’ లో ప్రియాంక అవకాశం సంపాదించిందని, తీరా హాలీవుడ్ సినిమాలో ఛాన్స్ రాగానే.. తన సినిమా నుంచి బయటకు వెళ్లిందని సల్మాన్ అన్నాడు. ఈ విధంగా ప్రియాంక తీరుపై సల్మాన్ అసహనం వ్యక్తం చేశాడు.