లోక్‌సభ ఎన్నికలకు మరో 8 నెలల గడువు ఉంది. కానీ నరేంద్ర మోదీని మరోసారి ప్రధాని చేసేందుకు ప్రచారం మాత్రం మొదలైంది. మోదీ 68వ పుట్టిన రోజు సందర్భంగా నమో యాప్ ద్వారా ఈ ప్రచారానికి శ్రీకారం చుట్టారు. నమో మళ్లీ రావాలి, నమో నమ్, ఇండియా మోడిఫైడ్ లాంటి స్లోగన్లతో.. టీ షర్ట్‌లు, క్యాప్‌లు, నోట్‌బుక్‌లు, పెన్నుల విక్రయాలను నరేంద్ర మోదీ యాప్‌ ద్వారా  ప్రారంభించారు. మోదీ అఫీయల్ యాప్‌ను ఇప్పటికే 50 లక్షల మందికి పైగా డౌన్‌లోడ్‌ చేసుకున్నారు. మోదీ యాప్‌లో ఫ్లిప్‌కార్ట్ తరహాలో ఫ్లైకార్ట్ అనే ఆన్‌లైన్ ప్లాట్‌ఫారమ్ ఉంది. ఫ్లైకార్ట్‌ అనేది ఢిల్లీకి చెందిన కంపెనీ. ఫిర్కి హోల్‌సేల్ ప్రైవేట్ లిమిటెడ్‌కు సంక్షిప్త రూపమే ఫ్లైకార్ట్. బీజేపీకి చెందిన మేథోపరమైన హక్కులు, ఉత్పత్తులను యాప్ ద్వారా విక్రయించేందుకు ఫ్లైకార్ట్‌తోపాటు ఇతర విక్రయ సంస్థలకు అనుమతి ఉంది. ప్రచారం కోసం రాష్ట్రాల విభాగాల నుంచి ఇలాంటి మర్చండైజ్‌లకు భారీ డిమాండ్ ఉంది.