అంతా పొదుపు మయం అంటున్నారు పాకిస్థాన్ ప్రధాని ఇమ్రాన్ ఖాన్. దేశం లోటు బడ్జెట్‌లో ఉందంటూ.. పొదుపు చర్యల్ని ప్రారంభించారు. అధికారుల్ని అలర్ట్ చేస్తూ.. ఎక్కడ ఛాన్స్ దొరికినా ఆ లోటును పూడ్చే చర్యల్ని ఇప్పటికే ప్రారంభించారు. మొన్నే ప్రధాని నివాసంలో ఉన్న కారుల్ని వేలానికి పెట్టారు. ప్రభుత్వ శాఖల్లోని కార్లను కూడా వదలకుండా వేలం వేయించారు. అలాగే విలాసవంతమైన ఏ వస్తువును వదలడం లేదు. ఇలా పొదుపు చర్యలతో డబ్బును సమకూర్చే పనిలో బిజీగా ఉన్న ఇమ్రాన్.. చివరికి గేదెల్ని కూడా వదల్లేదు.లోటు బడ్జెట్ పూడ్చే పేరుతో.. ప్రధాని నివాసంలో ఉన్న ఎనిమిది గేదెల్ని కూడా గురువారం వేలానికి పంపించారు ఇమ్రాన్. ఈ ఎనిమిది గేదెల్ని బజారులో వేలానికి పెట్టగా.. బంపర్ ధరకు అమ్ముడుపోయాయంట. వీటిని అమ్మితే ఏకంగా రూ.23 లక్షలు వచ్చాయట. ఈ విషయాన్ని పాక్ మీడియా మొత్తం కోడై కూసింది. ఈ గేదెల్లో కూడా కాస్ట్లీ గేదె ఒకటి ఉందట. అది అత్యధికంగా రూ.3,85,000లకు అమ్ముడు పోయిందట. ఇక మిగిలిన గేదెలను ఇమ్రాన్‌ సొంత పార్టీ పాకిస్థాన్‌ తెహ్రీక్‌ ఈ-ఇన్సాఫ్‌(పీటీఐ) కార్యకర్తలు కొనుకున్నారట.మరోవైపు కార్లు, విలాసవంతమైన వస్తువుల్ని వేలానికి పెట్టిన ఇమ్రాన్‌పై ప్రతిపక్షాలు విమర్శనాస్త్రాలు సంధిస్తున్నాయి. పొదుపు అని చెప్పుకుంటూ.. వచ్చిన డబ్బుని ఇమ్రాన్ తన జల్సాలకు వాడుకుంటున్నారంటూ తెగ ఫైరైపోతున్నారట. కొంతమందైతే.. ఈ లెక్కల సంగతేంటో కూడా తేల్చాలని నిలదీస్తున్నారట.