తెలుగు ప్రజలు దేశంలోనే కాదు, విదేశాల్లో సైతం తమ ఉనికి చాటుతున్నారు. ముఖ్యంగా అమెరికాలో తెలుగు మాట్లాడే ప్రజల సంఖ్య అనూహ్యంగా పెరగడం ఆశ్యర్యం కలిగిస్తోంది. తాజాగా విడుదలైన ఓ సర్వే ప్రకారం.. 2010 నుంచి 2017 మధ్య కాలంలో అమెరికాలోని ఇతర విదేశీ భాషస్తుల కంటే.. తెలుగువారి సంఖ్య 86 శాతానికి పెరిగిందట.అమెరికాలో చైనా, హిందీ, అరబిక్ వంటి విదేశీ భాషస్తుల కంటే తెలుగు భాషస్తుల సంఖ్యలోనే అధిక వృద్ధి కనిపించినట్లు సెంటర్ ఫర్ ఇమిగ్రేషన్ స్టడీ (సెప్టెంబరు, 2018) పేర్కొంది. అమెరికాలో మరే విదేశీ భాషలోనూ ఇంతటి వృద్ధి కనిపించలేదని తెలిపింది. తెలుగు తర్వాత హిందీ, గుజరాతీ భాషస్తుల సంఖ్యలో కూడా వృద్ధి కనిపించిందని సెంట్రల్ ఇమిగ్రేషన్ స్టడీ తెలిపింది.
2000 సంవత్సరంలో అమెరికాలో తెలుగు మాట్లాడేవారి సంఖ్య 87,543. అయితే, 2010 నాటికి ఈ సంఖ్య 2,22,977కు చేరింది. సెన్సస్ బ్యూరో పాపులేషన్ డేటా 2017 గణాంకాల ప్రకారం.. ప్రస్తుతం 415,414 మంది తెలుగువారు ఉన్నారు. 2008 నుంచి 2012 మధ్య కాలంలో హైదరాబాద్ నుంచి భారీ సంఖ్యలో ఇంజినీర్లు, సాఫ్ట్‌వేర్ ఉద్యోగులు అమెరికా వెళ్లారు. సుమారు 26 వేల మంది విద్యార్థులు ఉన్నత చదువులు కోసం వెళ్లారు. వీరిలో చాలామంది అక్కడే స్థిరపడటం, అమెరికాలోని భారతీయ సంస్థలు హైదరాబాద్ నుంచి భారీ సంఖ్యలో యువతకు అవకాశాలు కల్పించడంతో క్రమేనా తెలుగువారి సంఖ్య పెరిగినట్లు భావిస్తున్నారు. అమెరికాలో వ్యాపారమైనా మరే రంగమైనా తెలుగువారి పేరు మారుమోగుతూనే ఉంటుంది. 2013లో ఆంధ్రప్రదేశ్‌లోని విజయవాడకు చెందిన నినా దవులూరి మిస్ అమెరికా కిరీటాన్ని దక్కించుకుంది. ఆమె కుటుంబ సభ్యులు 1980లో అమెరికాలో స్థిరపడ్డారు. అంతేగాక, అమెరికాలో నిర్వహించే ఇంగ్లీష్ స్పెల్లింగ్ పోటీల్లో సైతం తెలుగు విద్యార్థులు విజేతలుగా నిలుస్తూ నిత్యం వార్తల్లో ఉంటున్నారు. కానీ, అమెరికాలో చోటుచేసుకుంటున్న జావి వివక్ష నేరాల్లో ప్రాణాలు కోల్పుతున్నవారిలోనూ తెలుగువారే ఎక్కువగా ఉండటం దురదృష్టకరం.