అన్ని వయసుల మహిళలకు శబరిమల అయ్యప్ప ఆలయంలోకి ప్రవేశం కల్పిస్తూ సుప్రీంకోర్టు వెల్లడించిన తీర్పుపై భిన్నాభిప్రాయాలు వ్యక్తమవుతున్నాయి. ఈ తీర్పును కేరళ ప్రభుత్వం, ట్రావెన్‌కోర్ దేవస్వామ్ బోర్డు స్వాగతించగా, శబరిమల ఆలయ ప్రధాన పూజారి (తంత్రి), పందళం రాజవంశీయులు తీవ్ర నిరాశ చెందినట్టు వ్యాఖ్యానించారు. అలాగే సామాజిక మాధ్యమాల్లో దీనిపై సుదీర్ఘ చర్చ జరుగుతోంది. సుప్రీం తీర్పుపై కేరళ దేవాదాయ, టూరిజం మంత్రిత్వ శాఖ మంత్రి కడకంపల్లి సురేంద్రన్ మాట్లాడుతూ.. సుప్రీం తీర్పును మనఃస్ఫూర్తిగా స్వాగతిస్తున్నామని, మహిళలకు సమన్యాయం జరిగిందని వ్యాఖ్యానించారు. కానీ, ఈ తీర్పును అమలుచేసే బాధ్యత మాత్రం ట్రావెన్‌కోర్ దేవస్వామ్ బోర్డు పరిధిలోనే ఉంటుందని స్పష్టం చేశారు. అయితే, ఈ ఆదేశాలు అమలులో కొన్ని ఇబ్బందులు ఉన్నాయి, కానీ వీటిని అధిగమించి ముందుకెళ్తామనే నమ్మకం ఉందని మంత్రి పేర్కొన్నారు. సుప్రీంకోర్టు తీర్పును స్వాగతిస్తున్నామని, వీటిని అమలుచేయడానికి తమ వంతు ప్రయత్నాలు చేస్తామని ట్రావెన్‌కోర్ దేవస్వామ్ బోర్డ్ అధ్యక్షుడు పద్మాకుమార్ వెల్లడించారు. దీనిపై భిన్నాభిప్రాయాలు ఉన్నా, సుప్రీం ఆదేశాలను తప్పకు పాటిస్తామని అన్నారు. రాష్ట్ర ప్రభుత్వం, శబరిమల ఆలయ తంత్రి, పందళ రాజ కుటుంబంతో చర్చించి అమలుకు ప్రయత్నిస్తామని తెలిపారు. చట్టప్రకారమే ట్రావెన్‌కోర్ దేవస్వామ్ బోర్డు ఏర్పాటైంది కాబట్టి, సుప్రీం ఆదేశాలను తప్పకుండా పాటించాల్సి ఉంటుందని పద్మాకుమార్ పేర్కొన్నారు. అనేక ఏళ్లుగా కొనసాగుతోన్న సంప్రదాయంలో సుప్రీంకోర్టు జోక్యం చేసుకోవడం దుర‌దృష్ట‌క‌రమని శబరిమల అయ్యప్ప ఆలయ పూజారి కందారారు రాజీవరు అన్నారు. పందళం రాజవంశీయులు సైతం ఇదే అభిప్రాయాన్ని వ్యక్తం చేశారని, తీర్పును క్షుణ్ణంగా చదినిన తర్వాతే తుదుపరి చర్యలకు ఉపక్రమిస్తామని తెలియజేశారు. మరోవైపు సుప్రీం తీర్పుపై సామాజిక మాధ్యమాల్లో బాహటంగానే వ్యతిరేకత వ్యక్తమవుతోంది. హిందూ మత ఆచారాలు, సంప్రదాయాల్లో జోక్యం చేసుకునే సుప్రీంకోర్టుకు ఇతర మతాల విషయంలో వేలుపెట్టే ధైర్యం ఉందా అని నిలదీస్తున్నారు. ఏ మంత్రాలు చదవాలో, ప్రసాదాలు ఏ సమయంలో ఇవ్వాలో, ఏ ఆగమశాస్త్రం ప్రకారం పూజలు చేయాలో మీరే చెప్పేయండి అంటూ సుప్రీంకోర్టు నిర్ణయంపై మండిపడుతున్నారు. ఒక్కో ఆలయంలో ఒక్కో విధమైన సంప్రదాయం ఉంటుంది.. అది కోట్లాది మంది భక్తుల మత విశ్వాసాలతో ముడిపడి ఉంటుందని, రాజ్యాంగం చెప్పే సమానత్వం మౌలిక సూత్రాలకే పరిమితమని అంటున్నారు. పురుషులపై నిషేధం ఉన్న ఆలయాల్లో ప్రవేశం కల్పించాలని ఎందుకు కోర్టులో సవాల్ చేయరు, అన్న విషయాలను మగవాళ్లు అర్థంచేసుకుంటారు.. నియమాలను వారు పాటిస్తారు.. దీన్ని వివక్షతగా భావించరని వ్యాఖ్యానిస్తున్నారు. దేశంలోని 25 లక్షల ఆలయాల్లో పురుషులకు ప్రవేశం నిషేధం విధించినవి ఆరు, మహిళలకు ప్రవేశం లేనివి కేవలం ఐదు మాత్రమే ఉన్నాయి.. ఇది హిందూ మతం భిన్నమైందనే విషయాన్ని రుజువు చేస్తుంది.. ఇప్పుడు దీన్ని సంస్కరణ అని పిలవాలా అంటూ మరో నెటిజన్ దుమ్మెత్తిపోశాడు. సుప్రీంకోర్టు ఎల్లప్పుడూ హిందూ విశ్వాసాలతోనే ఎందుకు దాడిచేస్తుంది.. బుర్ఖాను ఎందుకు నిషేధించరు.. రేపిస్ట్ బిషప్‌ల వ్యవహారాలను ఎందుకు సుమోటాగా స్వీకరించరని ప్రశ్నిస్తున్నారు.