గీతం యూనివర్సిటీ అధినేత, ఎమ్మెల్సీ, మాజీ ఎంపీ డాక్టర్ ఎంవీవీఎస్‌ మూర్తి అమెరికాలో జరిగిన రోడ్డు ప్రమాదంలో మృతి చెందిన విషయం తెలిసిందే. మూర్తితోపాటు మరో నలుగురు కాలిఫోర్నియా నుంచి అలాస్కాకు వెళ్తుండగా వారు ప్రయాణిస్తున్న వాహానాన్ని ట్రక్కు ఢీకొనడంతో ఈ ప్రమాదం జరిగింది. రెండు వారాల కిందట అమెరికాకు వెళ్లిన ఎంవీవీఎస్ మూర్తి, అక్టోబరు 6న జరగబోయే గీతం పూర్వ విద్యార్థుల సమ్మేళనంలో పాల్గొనాల్సి ఉంది. 1938 జులై 3న తూర్పుగోదావరి జిల్లా మూలపొలం గ్రామంలో జన్మించిన మూర్తి, ఆర్థికశాస్త్రంలో ఆంధ్ర విశ్వవిద్యాలయం నుంచి పీహెచ్‌డీ డిగ్రీ పొందారు. న్యాయవాదిగా, పారిశ్రామికవేత్తగా, విద్యావేత్తగా గుర్తింపు పొందిన ఆయన రెండుసార్లు ఎంపీగా కూడా బాధ్యతలు నిర్వర్తించారు. గోల్డ్‌స్పాట్ మూర్తిగా తెలుగువారికి సుపరిచితులై ఎంవీవీఎస్, ఎన్టీఆర్‌ స్ఫూర్తితో రాజకీయాల్లోకి వచ్చారు. తెలుగుదేశం పార్టీ ఆవిర్భావం నుంచి ఆ పార్టీలో క్రియాశీలకంగా వ్యవహరించారు. తొలిసారి టీడీపీ తరఫున 1989 ఎన్నికల్లో విశాఖపట్నం లోక్‌సభ నుంచి పోటీ చేసి ఓటమి చవిచూశారు. అయితే, రెండేళ్ల తర్వాత జరిగిన 1991 సాధారణ ఎన్నికల్లో ఇదే స్థానం నుంచి ఎంపీగా గెలుపొందారు. ఆ ఎన్నికల్లో కాంగ్రెస్‌కు చెందిన ఉమా గజపతిరాజుపై విజయం సాధించారు. అయితే, 96,98 ఎన్నికల్లో పోటీచేసి ఓడిపోయారు. తిరిగి 1999 ఎన్నికల్లో మరోసారి విశాఖపట్నం పార్లమెంటు నియోజకవర్గం నుంచి గెలుపొందారు. అనంతరం 2004 ఎన్నికల్లో మాజీ సీఎం నేదురుమల్లి జనార్థన్‌రెడ్డి చేతిలో ఓడిపోయారు. అయితే, 2009 ఎన్నికల్లో పోటీచేసినా మూడో స్థానానికే పరిమితమయ్యారు. ఈ ఎన్నికల్లో చిరంజీవి స్థాపించిన ప్రజా రాజ్యం పార్టీ ప్రభావం చూపింది. దీంతో కాంగ్రెస్ అభ్యర్థి పురందేశ్వరి విజయం సాధించారు. ఇక, 2014 ఎన్నికల్లో విశాఖపట్నం సీటును పొత్తులో భాగంగా బీజేపీకి కేటాయించడంతో పోటీకి దూరంగా ఉన్నారు. కానీ, ఎంవీవీఎస్ మూర్తి సేవలను గుర్తించిన టీడీపీ అధినేత చంద్రబాబు ఆయన్ని ఎమ్మెల్సీగా నామినేట్‌ చేశారు.సౌమ్యుడు, వివాదరహితుడిగా గుర్తింపు తెచ్చుకున్న ఎంవీవీఎస్ మూర్తి, రాజకీయనేతగా, విద్యావేత్తగా తనదైన ముద్రవేశారు. గాంధేయవాదాన్ని అనుసరించే ఎంవీవీఎస్ ఆయన పేరుతో మహాత్మా గాంధీ ఇన్‌స్టిట్యూట్ ఆఫ్ టెక్నాలజీ అండ్ మేనేజ్‌మెంట్ (గీతం) విద్యా సంస్థను ఏర్పాటు చేశారు. తెలుగు రాష్ట్రాల్లో ప్రత్యేక గుర్తింపు సాధించిన ఈ విద్యా సంస్థ అనంతరం గీతం వర్సిటీగా మారింది. ప్రభుత్వ సహకారంతో తూర్పు గోదావరి, విజయనగరం, విశాఖ జిల్లాల్లోనూ ఇంటర్, డిగ్రీ కాలేజీలను సైతం ప్రారంభించారు. మూర్తి అకాల మరణం విద్యా రంగానికి, రాజకీయ రంగానికీ తీరనిలోటు.