భయంకర తిత్లీ తుఫాన్ ఆంధ్రప్రదేశ్‌లోని శ్రీకాకుళం జిల్లాకు తీరని నష్టం మిగిల్చింది. తిత్లీ తుఫాన్ కారణంగా వేలాది మంది నిరాశ్రయులయ్యారు. కొన్ని వేల ఎకరాల్లో పంటలు నాశనమయ్యాయి. ఉద్దానం, వజ్రపు కొత్తూరు ప్రాంతాల్లో కొబ్బరి, అరటి, జీడిమామిడి, బొప్పాయి తోటలు నేలకొరిగాయి. దీంతో రైతులకు తీవ్ర నష్టం వాటిల్లింది. శ్రీకాకుళం, విజయనగరం జిల్లాల్లో తిత్లీ తుఫాను కారణంగా నష్టపోయిన ప్రజలను ఆదుకోవడానికి ముందుకు రావాలని, విరాళాలు అందజేయాలని ఇప్పటికే రాష్ట్ర ప్రజలను ముఖ్యమంత్రి చంద్రబాబు నాయుడు కోరారు. ఆయన పిలుపు మేరకు సామాన్య ప్రజలతో పాటు సినీ ప్రముఖులు, రాజకీయ నాయకులు స్పందించి విరాళాలు ఇస్తున్నారు. ఏపీలో ప్రతిపక్ష పార్టీగా ఉన్న వైఎస్సార్ కాంగ్రెస్ సైతం కోటి రూపాయలను తిత్లీ బాధితుల సహాయార్థం విరాళంగా ఇచ్చింది. అయితే వైసీపీ సాయాన్ని కొనియాడుతూ శ్రీకాకుళం టీడీపీ ఎంపీ కింజరపు రామ్మోహన్ నాయుడు ట్వీట్ చేశారు. తిత్లీ తుఫాను బాధితులను ఆదుకోవడానికి ముందుకొచ్చిన వైసీపీ‌ని తాను హృదయపూర్వకంగా అభినందిస్తున్నానని పేర్కొన్నారు. ఇలాంటి సమయాల్లోనే పార్టీ సరిహద్దులు దాటి మనం పనిచేయాలని, ప్రజలకు సేవ చేయాలని వెల్లడించారు. రాజకీయాల్లో టీడీపీ బద్ధ శత్రువుగా భావించే వైసీపీని ఆ పార్టీ ఎంపీ పొగడటం పట్ల పలువురు హర్షం వ్యక్తం చేస్తున్నారు. కొత్త తరం రాజకీయాలంటే ఇలానే ఉంటాయని, తాము కోరుకుంటున్నది కూడా ఇదేనని కొనియాడుతున్నారు. మరోవైపు శ్రీకాకుళంకు సాయం అందించిన హీరోలు విజయ్ దేవరకొండ, నిఖిల్‌ను కూడా రామ్మోహన్ నాయుడు అభినందించారు. నిస్వార్థమైన వారి సాయాన్ని తాను, శ్రీకాకుళం ప్రజలు మరిచిపోమని ట్వీట్ చేశారు.