తిత్లీ తుఫాను భీభత్సంతో అతలాకుతలమైన శ్రీకాకుళం ప్రాంత ప్రజల్ని ఆదుకునేందుకు టాలీవుడ్ స్టైలిష్ స్టార్ అల్లు అర్జున్ ముందుకొచ్చారు. తిత్లీ తుఫాన్ వల్ల నష్టపోయిన బాధితులకు రూ. 25 లక్షల భారీ ఆర్థిక సాయాన్ని ప్రకటించారు. ఈ సందర్భంగా.. ప్రజలంతా ధైర్యంగా ఉండాలని తన అభిమానులంతా సహాయ కార్యక్రమాల్లో చురుగ్గా పాల్గొనాలని అల్లు అర్జున్ పిలుపిచ్చారు. ప్రకృతి వైపరీత్యాల సమయంలో అల్లు అర్జున్ పలు సందర్భాల్లో తన పెద్ద మనసుని చాటుకున్నారు. ఇటీవల కేరళ వరద బాధితులకు సైతం రూ. 25 లక్షలు విరాళం ప్రకటించి తన పెద్ద మనసుని చాటుకున్నారు. గతంలో తమిళ నాడుకి 25 లక్షలు, ఉత్తరాఖండ్ వరదల సమయంలో రూ. 10 లక్షల ఇచ్చి తన ఔదార్యం చాటుకున్నారు. హుద్ హుద్ విపత్తు సమయంలోనూ రూ. 20 లక్షలు విరాళం ఇచ్చారు అల్లు అర్జున్. కాగా తుఫాన్ బాధితుల సహాయార్థం బాలక్రిష్ణ రూ. 25 లక్షలు, యంగ్ టైగర్ ఎన్టీఆర్ రూ.15 లక్షలు, కళ్యాణ్ రామ్ రూ.5 లక్షలు, వరుణ్ తేజ్ రూ.5, విజయ్ దేవరకొండ రూ. 5 లక్షలు, కొరటాల శివ రూ. 3 లక్షలు, సంపూర్ణేశ్ బాబు రూ. 50 వేలు అందజేశారు. అందరికంటే ముందుగా సంపూర్ణేష్ బాబు ముందుకు రావడమే కాకుండా తుఫాన్ ప్రభావిత ప్రాంతాల్లో స్వయంగా పాల్గొని ఆహారాన్ని అందిస్తున్నారు సంపూర్ణేష్ బాబు. ఈ భయంకర తిత్లీ తుఫాన్ బీభత్సం‌తో శ్రీకాకుళం, విజయనగరం జిల్లాల్లో రూ. 2800 కోట్ల మేర నష్టం వాటిల్లిందని అధికారికంగా ప్రకటించారు. బాధితులను ఆదుకోవడానికి పెద్ద మనసుతో ముందుకొచ్చి సీఎం రిలీఫ్ ఫండ్‌కు విరాళాలు అందజేయాలని రాష్ట్ర ప్రజలను కోరుతోంది ఏపీ ప్రభుత్వం.