మహేంద్రసింగ్‌ ధోని ‘ధనాధన్‌ ధోని’గా గుర్తింపు తెచ్చుకున్న నేల.. విరాట్‌ కోహ్లి ఛేదనలో మొనగాడిగా పేరు తెచ్చుకున్న గడ్డ.. టీమ్‌ఇండియాకు బాగా కలిసొచ్చిన వేదిక విశాఖపట్నంలోని ఏసీఏ- వీడీసీఏ స్టేడియంలో మరో అంతర్జాతీయ మ్యాచ్‌కు రంగం సిద్ధమైంది. భారత్‌-విండీస్‌ రెండో వన్డే ఈ రోజే.
    ‘భారత జట్టుపై గెలవాలంటే మేం ఎంత స్కోరు సాధించాలో అర్థం కావడం లేదు’ తొలి వన్డే ముగిశాక వెస్టిండీస్‌ కెప్టెన్‌ జేసన్‌ హోల్డర్‌ చేసిన వ్యాఖ్య ఇది. ప్రస్తుతం టీమిండియా ఏస్థాయిలో ఆడుతుందో అతడి కామెంట్‌ను గమనిస్తే తెలుస్తుంది. ఓపెనర్‌ రోహిత్‌ శర్మ, కెప్టెన్‌ విరాట్‌ కోహ్లీ అద్భుత శతకాలతో తొలి వన్డేను ఘనంగా ముగించిన భారత్‌ బుధవారం విశాఖలోని ఏసీఏ-వీడీసీఏ మైదానంలో జరిగే రెండో డే అండ్‌ నైట్‌ మ్యాచ్‌లో విండీస్ తో తలపడనుంది. ఈ మ్యాచ్‌లోనూ తిరుగులేని ఆధిపత్యాన్ని కొనసాగించాలని భారత్‌ భావిస్తోంది