నందమూరి బాలకృష్ణ కుమార్తె, మంత్రి నారా లోకేష్ భార్య నారా బ్రాహ్మణిపై హీరో మంచు మనోజ్ ప్రశంసల వర్షం కురిపించారు. సింహం కడుపున సింహమే పుడుతుందని కొనియాడారు. ఇంతకీ అసలు విషయం ఏంటంటే.. తిత్లీ తుఫాన్ కారణంగా తీవ్రంగా నష్టపోయిన శ్రీకాకుళం జిల్లాకు హెరిటేజ్ ఫుడ్స్ అండగా నిలిచిన సంగతి తెలిసిందే. ఆ కంపెనీ మేనేజింగ్ డైరెక్టర్గా ఉన్న బ్రాహ్మణి రూ.66 లక్షల చెక్కును ఇటీవల సీఎం చంద్రబాబుకు అందజేశారు. ఈ మొత్తాన్ని ఏపీ స్మార్ట్ విలేజ్ ప్రోగ్రామ్కు వినియోగిస్తామని అప్పుడు చెప్పారు. 

దీనిలో భాగంగా శ్రీకాకుళం జిల్లాలోని తుఫాన్ ప్రభావిత గ్రామాలను దత్తత తీసుకుని వాటిని అభివృద్ధి చేస్తామని చెప్పారు. బ్రాహ్మణి తీసుకున్న ఈ నిర్ణయానికి మనోజ్ ఫిదా అయిపోయారు. ఈ మేరకు ఆమెను ట్విట్టర్ ద్వారా ఆకాశానికి ఎత్తేశారు. ‘శ్రీకాకుళం కోసం ఆమె తీసుకున్న నిర్ణయం నిజంగా స్ఫూర్తిదాయకం. నాకు తెలిసిన శక్తివంతమైన స్త్రీలలో ఈమె ఒకరు. బ్రాహ్మణి తీసుకున్న గొప్ప నిర్ణయం ఇది. బాధితులకు అండగా ఇంతమంది నిలబడటం చూస్తుంటే చాలా ఆనందంగా ఉంది. సింహాం కూతురు సింహమే అవుతుంది. జై బాలయ్య’ అని ట్వీట్లో మనోజ్ పేర్కొన్నారు. 

మనోజ్ ట్వీట్కు మిశ్రమ స్పందన వస్తోంది. కొంత మంది బ్రాహ్మణి చొరవను కొనియాడుతుంటే.. మరికొద్దరు మనోజ్ పేర్కొన్న ‘సింహాలు’ అనే మాటను ట్రోల్ చేస్తున్నారు. పవన్ అభిమానులు కొందరు ఇది ఫేక్ న్యూస్ అని కొట్టిపారేస్తున్నారు. శ్రీకాకుళంలో గ్రామాలను దత్తత తీసుకున్నారంటే ఎవరూ నమ్మరు అంటూ కామెంట్లు పెడుతున్నారు. ఎక్కువగా జనసేన, పవన్ కళ్యాణ్ ఫొటోలను ప్రొఫైల్ పిక్చర్లుగా పెట్టుకున్న ట్విట్టర్ యూజర్లే మనోజ్ వ్యాఖ్యలను తీవ్రంగా వ్యతిరేకిస్తున్నారు.