విరాట్‌ మళ్లీ ఆడాడు.. మరోసారి శతకంతో చెలరేగాడు.. భారత్‌ను ఒంటిచేత్తో గెలిపించేలా కనిపించాడు.. కానీ ఆఖరికి వచ్చేసరికి ఫలితం తారుమారైంది.. సొంతగడ్డపై కోహ్లి ఎప్పుడు సెంచరీ చేసినా ఓడిపోని భారత్‌ మొదటిసారి పరాజయం చవిచూసింది.. వెస్టిండీస్‌ ఆల్‌రౌండ్‌ ప్రదర్శనతో అదరగొట్టిన వేళ మూడో వన్డేలో భారత్‌కు ఓటమి ఎదురైంది. మిడిల్‌, లోయర్‌ ఆర్డర్‌ బ్యాట్స్‌మెన్‌ పరుగులు చేయడంలో ఘోరంగా విఫలమైన వేళ వన్డే సిరీస్‌లో భారత్‌ తొలి ఓటమి మూటగట్టుకుంది. తొలి వన్డేలో గెలిచి.. రెండో మ్యాచ్‌ టై చేసుకున్న భారత్‌.. మూడో వన్డేలో ఓడడంతో ఐదు వన్డేల సిరీస్‌ 1-1తో సమమైంది. ఈ సిరీస్‌లో విండీస్‌కు దక్కిన తొలి విజయమిదే. నాలుగో వన్డే సోమవారం ముంబయిలో జరుగుతుంది.