అక్కినేని నాగచైతన్య, సమంత పెళ్లి తర్వాత తొలిసారి జంటగా వెండితెరపై సందడి చేయబోతున్నారట. ‘ఏమాయ చేసావె’, ‘ఆటోనగర్‌ సూర్య’, ‘మనం’ సినిమాల్లో జంటగా సందడి చేసిన వీరిద్దరూ మరో కొత్త ప్రాజెక్టులో నటించే అవకాశాలు ఉన్నట్లు తెలుస్తోంది. రొమాంటిక్‌ కథాంశంతో ఈ సినిమా రూపుదిద్దుకోనుందట. ‘నిన్నుకోరి’ దర్శకుడు శివ నిర్వాణ ఈ సినిమాను తెరకెక్కించనున్నట్లు సమాచారం. చై-సామ్‌ ఇప్పటికే కథ విన్నారట. ఇద్దరికి నచ్చినట్లు సన్నిహిత వర్గాలు చెబుతున్నాయి. ఇక సినిమాకు సంతకాలు చేయడమే మిగిలి ఉందట.

చై-సామ్ జోడీగా సినిమా రాబోతోందని గతంలో జోరుగా ప్రచారం జరిగింది. బాలీవుడ్‌లో సూపర్‌హిట్‌ ‘2స్టేట్స్‌’ తెలుగు రీమేక్‌లో వీరిద్దరూ నటించబోతున్నారని చెప్పుకొచ్చారు. ఆ తర్వాత ఈ వార్తల్లో నిజం లేదని స్పష్టమైంది. ఇప్పుడు ఈ రీమేక్‌లో అడివిశేష్‌ హీరోగా నటిస్తున్నారు. సీనియర్‌ నటుడు రాజశేఖర్‌ కుమార్తె శివానీ ఈ చిత్రంతో నటిగా పరిచయం కాబోతున్నారు.

సమంత ఇటీవల ‘రంగస్థలం’ సినిమా షూటింగ్‌ పూర్తి చేసుకున్నారు. రామ్‌చరణ్‌ కథానాయకుడిగా నటిస్తున్న ఈ సినిమాకు సుకుమార్‌ దర్శకత్వం వహిస్తున్నారు. మార్చి 30న ప్రేక్షకుల ముందుకు రాబోతోంది. మరోపక్క ఆమె కీలక పాత్రలో ‘మహానటి’ రూపుదిద్దుకుంటోంది. పలు తమిళ చిత్రాల్లోనూ సమంత కథానాయిక పాత్ర పోషిస్తున్నారు. చైతన్య ప్రస్తుతం మారుతి దర్శకత్వంలో నటిస్తున్నారు. ఈ సినిమాకు ‘శైలజారెడ్డి అల్లుడు’ అనే టైటిల్‌ను పరిశీలిస్తున్నారు. అను ఇమ్మాన్యుయేల్‌ కథానాయిక. ఇటీవల చిత్రీకరణ ప్రారంభమైంది. చైతన్య కథానాయకుడిగా నటించిన ‘సవ్యసాచి’ సినిమా విడుదలకు సిద్ధమవుతోంది. చందు మొండేటి దర్శకత్వం వహిస్తున్న ఈ సినిమాలో నిధి అగర్వాల్‌ కథానాయిక పాత్ర పోషిస్తున్నారు.