రెగ్యూలర్ కెప్టెన్ విరాట్‌ కోహ్లీ టెస్టుల్లో తన అగ్రస్థానాన్ని మరింత పదిలం చేసుకున్నాడు. ఐసీసీ గురువారం ప్రకటించిన తాజా టెస్టు ర్యాంకింగ్స్‌లో 935 పాయింట్లతో కోహ్లీ నెంబర్ వన్‌గా నిలిచాడు. ఆస్ట్రేలియా క్రికెటర్, బాల్ ట్యాంపరింగ్‌ వివాదంలో ఏడాదిపాటు నిషేధంలో ఉన్న స్టీవ్ స్మిత్ 910 పాయింట్లతో ఇంకా రెండో స్థానంలో కొనసాగుతున్నాడు. న్యూజిలాండ్ కెప్టెన్ కేన్ విలియమ్సన్ (847), ఇంగ్లాండ్ స్టార్ క్రికెటర్ జో రూట్ (835), డేవిడ్ వార్నర్ (803) టాప్ 5లో ఉన్నారు. భారత ఆటగాడు చతేశ్వర్ పుజారా (765) ఈ జాబితాలో 6వ స్థానంలో ఉన్నాడు. ట్యాంపరింగ్ వివాదంలో చిక్కుకున్నా.. నేటికీ ఆసీస్ స్టార్ క్రికెటర్లు టాప్ 5లో కొనసాగడం గమనార్హం. టీమ్ పరంగా టెస్ట్ ర్యాంకుల్లో భారత్‌ నంబర్‌ వన్‌లో కొనసాగుతోంది. ఇటీవల వెస్టిండీస్‌పై 2-0తో టెస్టు సిరీస్‌ గెలిచిన కోహ్లీసేన 116 పాయింట్లతో ఉంది. దక్షిణాఫ్రికా (106), ఇంగ్లాండ్ (105), న్యూజిలాండ్ (102), ఆస్ట్రేలియా (102) టాప్ 5లో నిలిచాయి.