ఛత్తీస్‌గఢ్‌లో బీజేపీ మేనిఫెస్టోను విడుదల చేసింది. శనివారం రాయ్‌పూర్‌లో బీజేపీ జాతీయ అధ్యక్షుడు అమిత్ షా, సీఎం రమణ్‌సింగ్‌తో కలిసి ‘సంకల్ప్ పాత్ర’ పేరుతో మేనిఫెస్టోను ప్రజల ముందు ఉంచారు. ప్రధానంగా మహిళలకు, విద్యార్థులకు వరాలు కురిపించారు. మహిళలకు రూ.2లక్షల వరకు వడ్డీలేని రుణాలు ఇస్తామన్నారు. 12వ తరగతి వరకు విద్యార్థులకు ఉచిత పుస్తకాలు, యూనిఫామ్‌లను పంపిణీ చేస్తామని హామీ ఇచ్చారు. గిరిజనులు, రైతుల సంక్షేమం కోసం మరిన్ని పథకాలను ప్రవేశ పెడతామన్నారు.60 ఏళ్లు పైబడి.. భూముల్లేని పేదలకు నెలకు రూ. వెయ్యి చొప్పున పెన్షన్ ఇస్తామని తెలిపారు. అంబికాపూర్, జగదల్‌పూర్‌లో సూపర్ స్పెషాలిటీ ఆస్పత్రులు ఏర్పాటు చేస్తామని హామీ ఇచ్చారు. ఛత్తీస్‌గఢ్‌లో ఫిల్మ్ సిటీ నిర్మాణం, రాయ్‌పూర్, అటల్ నగర్, భైలై, దుర్గ్, రాజ్‌నంద్‌గావ్ క్లస్టర్‌ను అభివృద్ధి చేస్తామన్నారు. బీజేపీ హయాంలో ఛత్తీస్‌గఢ్ సంక్షేమ రాష్ట్రంగా మారిందన్నారు అమిత్ షా. ఎంజీఎన్‌ఆర్‌ఈజీఏ సహా వివిధ పథకాలన్నీ అవినీతికి తావులేకుండా అమలు చేస్తున్నామని.. గత 15ఏళ్లలో రమణసింగ్‌ ప్రభుత్వం రాష్ట్రంలో ఎన్నో మార్పులను తీసుకొచ్చిందన్నారు. రాష్ట్రాన్ని నక్సల్‌ రహిత ప్రాంతంగా తీర్చిదిద్దడంలో సీఎం రమణ సింగ్ పాత్ర అద్భుతమని ప్రశంసలు కురిపంచారు. నైపుణ్య అభివృద్ధిపై చట్టం తీసుకువచ్చిన మొదటి రాష్ట్రం ఛత్తీస్‌గఢ్ అన్నారు. మరోసారి బీజేపీ ప్రభుత్వం అధికారంలోకి రావడం ఖాయమని ధీమా వ్యక్తం చేశారు. ఛత్తీస్‌గఢ్‌లో శనివారంరాత్రితో మొదటి విడత ఎన్నికల ప్రచారం ముగియనుంది. 12న పోలింగ్ జరుగనుంది. శుక్రవారం కాంగ్రెస్ మేనిఫెస్టో విడుదల చేయగా.. ఇవాళ బీజేపీ ప్రజల ముందు ఉంచింది. అలాగే బీజేపీ, కాంగ్రెస్‌ నేతలు హోరాహోరీగా ప్రచార కార్యక్రమాలను నిర్వహిస్తున్నారు. శుక్రవారం రాహుల్ గాంధీ, ప్రధాని మోదీ ప్రచారం నిర్వహించగా.. శనివారం లోర్మి ప్రాంతంలో బీజేపీ తరఫున ఉత్తర్‌ప్రదేశ్‌ ముఖ్యమంత్రి యోగి ఆదిత్యనాథ్‌ ఎన్నికల ప్రచార సభలో పాల్గొన్నారు