వెస్టిండీస్ వేదికగా జరుగుతున్న టీ20 ప్రపంచకప్‌లో భారత్ మహిళల జట్టు పక్కా ప్రణాళికతో ముందుకు సాగుతున్నది. టోర్నీ టైటిల్ ఫేవరెట్లలో ఒకటైన..న్యూజిలాండ్‌పై అద్భుత విజయంతో టీమ్‌ఇండియా అదిరిపోయే బోణీ కొట్టింది. కెప్టెన్ హర్మన్‌ప్రీత్‌కౌర్ కొట్టిన కొట్టుడుకు కివీస్ గజగజ వణికిపోయింది. ఇదే జోరులో చిరకాల ప్రత్యర్థి పాకిస్థాన్‌ను  ఓడించింది. సీనియర్ బ్యాట్స్‌వుమన్ మిథాలీరాజ్ విజృంభణతో వరుసగా రెండో విజయాన్ని ఖాతాలో వేసుకుంది. ఇప్పుడు ఐర్లాండ్ వంతు వచ్చింది.  గురువారం గయానా వేదికగా జరిగే మ్యాచ్‌లో హ్యాట్రిక్ విజయంతో సెమీఫైనల్ బెర్తును ఖరారు చేసుకునేందుకు టీమ్‌ఇండియా తహతహలాడుతున్నది. మరోవైపు రెండు మ్యాచ్‌ల్లో ఓటములు ఎదుర్కొన్న ఐరీష్..కనీసం పోటీనివ్వాలన్న పట్టుదలతో కనిపిస్తున్నది.