2.ఓ సినిమాలో ప్రతినాయకుడు పాత్ర పోషిస్తున్న అక్షయ్ కుమార్‌ భయానకంగా కనిపించేందుకు ఎంతో కష్టపడ్డారు. తన కెరీర్‌లో తొలిసారిగా ఆయన ఇలాంటి మేకప్ వేసుకున్నారు. ఇటీవల జరిగిన సినిమా ట్రైలర్ రిలీజ్ వేడుకలో అక్షయ్ మాట్లాడుతూ.. ఆ మేకప్ వేయడానికి 3 గంటలు పట్టేదని, తీయడానికి సుమారు గంటన్నర సమయం పట్టేదని తెలిపారు. సుమారు రూ.550 కోట్లతో నిర్మించిన ఈ సినిమాలో రజనీకాంత్ శాస్త్రవేత్తగా, రోబోగా ద్విపాత్రభినయం చేస్తున్న సంగతి తెలిసిందే. ఆయనతో పాటు అమీ జాక్సన్ కూడా మరో కీలక పాత్రలో కనిపించనుంది. ఈ నెల 29న ఈ సినిమా దేశవ్యాప్తంగా విడుదల కానుంది. ఈ సందర్భంగా అక్షయ్ కుమార్‌‌ను మేకప్‌తో పూర్తిగా భయనంగా మార్చేసిన వీడియోను చిత్రయూనిట్ తాజాగా విడుదల చేసింది. ఈ వీడియోను అక్షయ్ కుమార్ ట్విట్టర్ ద్వారా తన అభిమానులతో పంచుకున్నారు.