నర్మదా నదీ తీరంలో ఏర్పాటుచేసిన ‘స్టాట్యూ ఆఫ్ యునిటీ’ ప్రపంచంలోనే అతి పొడవైన విగ్రహంగా ఆకట్టుకుంటోంది. రూ.2800 కోట్ల వ్యయంతో రూపొందించిన ఈ విగ్రహం అంతరిక్షం నుంచి కూడా స్పష్టంగా కనిపిస్తోంది. నెట్‌వర్క్ ప్లానెట్‌ అనే కమర్షియల్ శాటిలైట్ నెట్‌వర్క్ సంస్థ అంతరిక్షం నుంచి ఈ అద్భుతాన్ని కెమేరాలో బంధించింది. నవంబరు 15న తీసిన ఈ చిత్రం ఇప్పుడు ఇంటర్నెట్‌లో వైరల్‌గా చక్కర్లు కొడుతోంది. ప్రపంచంలో అంతరిక్షం నుంచి అత్యంత స్పష్టంగా కనిపించే మానవ నిర్మిత కట్టడాల్లో సర్దార్ వల్లభాయ్ పటేల్ విగ్రహం (స్టాట్యూ ఆఫ్ యునిటీ) కూడా ఒకటిగా నిలిచిపోనుంది. ఇప్పటి వరకు ఈ ఘనత దుబాయ్ తీరంలోని పామ్ ఐలాండ్స్, గిజాలోని గ్రేట్ పిరమిడ్స్‌కు మాత్రమే ఈ పేరుంది. అక్టోబరు 31న పటేల్ 143వ జయంతి పురస్కరించుకుని ప్రధాని నరేంద్ర మోదీ ఈ విగ్రహాన్ని ఆవిష్కరించిన సంగతి తెలిసిందే. 182 మీటర్లు (597 అడుగులు) ఎత్తుతో ఈ విగ్రహం ప్రపంచంలోనే అతి పెద్ద విగ్రహంగా రికార్డులకెక్కి యావత్ ప్రపంచాన్ని ఆకట్టుకుంటోంది. నవంబరు 12వ తేదీ నాటికి ఈ విగ్రహాన్ని 1.28 లక్షల మంది సందర్శించారు.