రైల్వే స్టేషన్లో ఓ అర గంటపాటు ఫ్రీగా వైఫై వస్తేనే సూపర్ అనుకుంటున్నాం కదూ. అదే రోజంతా ఉచితంగా వైఫై సేవలను పొందగలిగితే..? మొబైల్ నెట్‌వర్క్ రాని మారుమూల ప్రాంతం నుంచి, ఆ మాటకొస్తే.. ప్రపంచంలోని ఎక్కడి నుంచైనా ఈ సేవలను అందుకోగలిగితే..? నిజంగా సూపర్ కదూ. కానీ ఇదేలా సాధ్యం అనుకుంటున్నారా? చైనాకు చెందిన ఇంటర్నెట్ టెక్నాలజీ సంస్థ దీన్ని సాధ్యం చేసేందుకు ప్రణాళికలు రూపొందిస్తోంది. ఇందుకోసం 2026 నాటికి 272 ఉపగ్రహాలను ప్రయోగించే దిశగా అడుగులేస్తోంది. 2013లో షాంఘైలో ఏర్పాటైన లింక్‌స్యూర్ నెట్‌వర్క్ అనే సంస్థ ఇప్పటికే తొలి శాటిలైట్‌ను మంగళవారం ఆవిష్కరించింది. ఈ ఉపగ్రహాన్ని చైనాలోని గన్సూ ప్రావిన్స్‌లో ఉన్న జియుక్వాన్ శాటిలైట్ లాంచింగ్ సెంటర్‌ నుంచి వచ్చే ఏడాది ప్రయోగించనున్నారు. 2020 నాటికి ఇలాంటివి పది ఉపగ్రహాలను అంతరిక్షంలోకి పంపిస్తారు. క్రమంగా ఈ ఉపగ్రహాల సంఖ్యను పెంచుకుంటూపోయి.. 2026 నాటికి 272 శాటిలైట్లను ప్రయోగిస్తారు. వీటి ద్వారా ఫోన్ సిగ్నల్ అందని మారుమూల ప్రాంతాల్లోనూ ప్రజలు ఇంటర్నెట్ సేవలను పొందొచ్చు. ఈ ప్రాజెక్ట్ కోసం తమ సంస్థ 431.4 మిలియన్ డాలర్లు ఖర్చు పెడుతుందని లింక్‌స్యూర్ నెట్‌వర్క్ సీఈవో వాంగ్ జింగ్‌యింగ్ తెలిపారు. ఐక్యరాజ్య సమితి దగ్గరున్న సమాచారం ప్రకారం 2017 చివరి నాటికి ప్రపంచంలో 390 కోట్ల మందికి ఇంటర్నెట్ సౌకర్యం అందుబాటులో లేదు. భౌగోళికంగా, మౌలిక వసతుల పరంగా ఎదురవుతున్న ఇబ్బందులే దీనికి కారణం. టెలీకాం సంస్థలు మారుమూల ప్రాంతాల్లో నెట్‌వర్క్‌ను అందించలేకపోతున్నాయి. దీంతో శాటిలైట్ల ద్వారా వైఫై సేవలను అందించాలని సదరు సంస్థ భావిస్తోంది.ఇప్పటికే గూగుల్, స్పెస్‌ఎక్స్, వన్‌వెబ్, టెలీశాట్ లాంటి సంస్థలు ఉచితంగా ఇంటర్నెట్ అందించడం కోసం శాటిలైట్లను ఉపయోగించే ప్రణాళికలను ప్రారంభించాయి. అమెరికా జీపీఎస్‌కు పోటీగా బైదూ నావిగేషన్ శాటిలైట్ సిస్టమ్ (బీడీఎస్)ను చైనా ఏర్పాటు చేస్తోంది. ఇప్పటికే రష్యాకు గ్లోనాస్, యూరోపియన్ యూనియన్‌కు గెలీలియో పేరిట శాటిలైట్ నావిగేషన్ వ్యవస్థలున్నాయి. భారత్ కూడా నావిక్ పేరిట సొంత నావిగేషనల్ సిస్టమ్‌ను రూపొందిస్తోంది.