కలియుగ ప్రత్యక్ష దైవం శ్రీ వేంకటేశ్వరుడు కొలువై ఉన్న పవిత్ర పుణ్యక్షేత్రం తిరుమల. నిత్యం వేలాది మంది భక్తులు గోవింద నామస్మరణతో తరలివచ్చి శ్రీవారిని దర్శించుకుంటారు. ఆధ్యాత్మికంగానే కాకుండా.. ప్రకృతి ప‌రంగానూ తిరుమలలోని ఏడు కొండలు ఎంతో ప్రసిద్ధి చెందాయి. ఎన్నో జీవరాశులకు ఆలవాలమైన తిరుమలను ప్లాస్టిక్ రహితంగా తీర్చిదిద్దాలని తిరుమల తిరుపతి దేవస్థానం(టీటీడీ) నిర్ణయించింది. ఇప్పటికే ఆ దిశగా చర్యలు తీసుకుంటున్న దేవస్థానం మరో కీలక అడుగు వేస్తోంది. తిరుమల, తిరుపతిని ప్లాస్టిక్ రహితంగా తీర్చిదిద్దేందుకు టీటీడీ కీలక నిర్ణయం తీసుకుంది. శ్రీవారి లడ్డూలకు వినియోగిస్తున్న ప్లాస్టిక్ కవర్లను పూర్తిగా నిషేధించి.. వాటి స్థానంలో పేపర్ బాక్సులు ప్రవేశపెట్టాలని నిర్ణయించింది. శ్రీవారి లడ్డూలను ఇకపై ఫుడ్ గ్రేడ్ కలిగిన పేపర్ బాక్సుల్లో అందజేస్తామని టీటీడీ ఈవో అనిల్ కుమార్ సింఘాల్ తెలిపారు. తిరుపతిని ప్లాస్టిక్ రహితంగా చేయాలన్న ప్రభుత్వ లక్ష్యానికి అనుగుణంగా తిరుమలలోనూ ప్లాస్టిక్ వినియోగాన్ని వీలైనంత తగ్గించేందుకు చర్యలు తీసుకుంటున్నట్లు సింఘాల్ తెలిపారు. తిరుమల కొండపై ప్లాస్టిక్ కవర్లు, గ్లాసులు, కప్పుల వినియోగాన్ని తగ్గించి ప్లాస్టిక్ రహితంగా తీర్చిదిద్దుతామని పేర్కొన్నారు. తిరుచానూరుతో పాటు టీటీడీ అనుబంధ ఆలయాల్లోనూ ఈ విధానాన్ని అమలు చేస్తామన్నారు. తితిదే ప్రవేశపెట్టే పేపర్ బాక్సులు మూడు సైజుల్లో ఉంటాయి. భక్తులు కొనుగోలు చేసే లడ్డూల సంఖ్యను బట్టి ఆయా సైజుల్లో అందిస్తారు. అయితే ఈ విధానం వల్ల టీటీడీ ఆదాయం కోల్పోయే సూచనలు కనిపిస్తున్నాయి. ప్లాస్టిక్ కవర్లలో లడ్డూలు పంపిణీ చేసినప్పుడు ఎక్కువ లడ్డూలు కొనుగోలు చేసిన భక్తులు వాటిని తీసుకెళ్లేందుకు పెద్ద కవర్లు డబ్బులు పెట్టి కొనుగోలు చేసేవారు. వాటితో టీటీడీకి కొంత ఆదాయం వచ్చేది. పేపర్ బాక్సులు ప్రవేశ పెట్టడం ద్వారా బోర్డు ఆ ఆదాయాన్ని కోల్పోయే అవకాశం ఉందని కొందరు అభిప్రాయపడుతున్నారు. దీనిపై ఈవో స్పందిస్తూ.. పేపర్ బాక్సులు ప్రవేశపెట్టిన తర్వాత భక్తుల అభిప్రాయాలు తీసుకుని రుసుము వసూలు చేయాలా? వద్దా? అన్న దానిపై నిర్ణయం తీసుకుంటామన్నారు. లడ్డూలు బాక్సుల్లో పెట్టడం వల్ల వాటి నాణ్యతలో ఎలాంటి మార్పు ఉండదని ఈవో తెలిపారు. పేపర్ బాక్సుల్లో లడ్డూ సుమారు పది రోజుల పాటు తాజాగా ఉంటుందని తెలిపారు. టీటీడీ రోజుకు సుమారు 10వేల ప్లాస్టిక్ కవర్లను భక్తులకు అందజేస్తోందని.. వాటి స్థానంలో పేపర్ బాక్సులు ప్రవేశపెడితే ప్లాస్టిక్ రహిత నగరం లక్ష్యాన్ని త్వరగా చేరుకుంటామని సింఘాల్ అన్నారు.