ధనిక రాష్ట్రాన్ని అప్పగిస్తే కేసీఆర్ అప్పుల పాలు చేశారని మండిపడ్డారు టీడీపీ అధినేత చంద్రబాబు. కేసీఆర్ అబద్దాల కోరు.. నోరు పారేసుకోవడం బాగా అలవాటంటూ ఫైరయ్యారు. రాజకీయాల్లో హుందాతనం ఉండాలని.. అంతేకాని దిగజారుడు విమర్శలు చేయడం మంచి పద్దతి కాదన్నారు. తెలంగాణ, హైదరాబాద్ అభివృద్ధి పథంలో నడుస్తున్నాయంటే అది టీడీపీ ముందుచూపు వల్లే సాధ్యమయ్యిందన్నారు. శనివారం రాజేంద్రనగర్‌ టీడీపీ అభ్యర్థి గణేష్ గుప్తా తరుపున ఎన్నికల ప్రచారంలో పాల్గొన్న బాబు.. కేసీఆర్, మోదీలపై విరుచుకుపడ్డారు. తెలుగు దేశం పార్టీ లేకపోతే కేసీఆర్ ఉండేవారా అని ప్రశ్నించారు చంద్రబాబు. తనతో పని చేసి ఇప్పుడు తననే విమర్శిస్తున్నారని మండిపడ్డారు. కేసీఆర్ తనను విమర్శిస్తే వచ్చే లాభం ఏంటో అర్థం కావడం లేదన్నారు. తెలంగాణకు కేసీఆర్ అన్యాయం చేస్తున్నారన్నారని.. కేంద్రం ఇచ్చిన ఏ హామీలు అమలు చేయకపోయినా.. కేసీఆర్ మాత్రం మోదీకి వంతపాడుతున్నారని దుయ్యబట్టారు. అందుకే కేసీఆర్ పేరును సీబీఐ కేసు నుంచి తప్పించారని ఆరోపించారు. చిన్న మోదీ, పెద్దమోదీ (కేసీఆర్‌, మోదీ)లు కలిసి మాటల గారడీతో ప్రజలను మోసం చేస్తున్నారు. కేసీఆర్‌కు ఓటమి భయం పట్టుకుందని.. అందుకే తనను టార్గెట్ చేశారన్నారు. హైదరాబాద్‌ను నిర్మించానని ఎక్కడా చెప్పలేదని.. సైబరాబాద్‌ను తానే నిర్మించానంటున్నారు చంద్రబాబు. ప్రపంచమంతా తిరిగి సైబరాబాద్‌కు కంపెనీలు తీసుకొచ్చామన్నారు. ఎయిర్‌పోర్టు, ఔటర్‌రింగ్‌రోడ్డు, హైటెక్‌సిటీ టీడీపీ హయాంలోనే వచ్చాయని గుర్తు చేశారు. హైదరాబాద్ కు మంజీరా నీళ్లు తెచ్చామని.. రాజేంద్రనగర్ అభివృద్ధికి బీజం వేసింది తానే అన్నారు. టీఆర్‌ఎస్‌ అధికారంలోకి వచ్చాక అభివృద్ధి కుంటుపడిందని విమర్శించారు. పెద్ద నోట్ల రద్దుతో ప్రధాని నరేంద్ర మోడీ జనాన్ని ఇబ్బంది పెట్టారని మండిపడ్డారు చంద్రబాబు. దేశంలో ప్రజాస్వామ్యం ప్రమాదంలో ఉందని.. ముస్లిం సోదరులకు అన్యాయం జరుగుతోందన్నారు. మోడీ రాజకీయ దాడులు చేస్తూ, వేధింపులకు గురి చేస్తున్నారని విమర్శించారు. అందుకే బీజేపీయేతర కూటమికి ముందుకొచ్చామని.. 37 ఏళ్ల పాటు విభేదించిన కాంగ్రెస్‌తో కలిసి ప్రజాస్వామ్యాన్ని రక్షించుకునేందుకు పోరాడుతున్నామన్నారు. తనకు పదవీ వ్యామోహం లేదని.. ప్రధాని కావాలన్న ఆశ లేదన్నారు చంద్రబాబు.