మాజీ మంత్రి రావెల కిశోర్‌బాబుపై తెలుగుదేశం నేతలు చేసిన వ్యాఖ్యలు దళిత జాతిని అవమానపరిచేలా ఉన్నాయని జనసేన నేతలు మండిపడ్డారు. కిశోర్‌బాబు చేరడంతో జనసేన పార్టీ మైల పడిందని తెదేపా నేతలు వ్యాఖ్యానించడం వారి దుర్మార్గానికి పరాకాష్ఠ అని దుయ్యబట్టారు. తెదేపా నేతల వ్యాఖ్యలకు నిరసనగా జనసేన పార్టీ నేతలు నిరసన చేపట్టారు. ఎన్టీఆర్ నుంచి చంద్రబాబు పార్టీ లాక్కున్నపుడే తెదేపా మైల పడిందని జనసేన నేత ఒకరు అన్నారు. ‘మైల’ అన్న పదం వాడటం తెదేపా నేతల దురంహకారానికి నిదర్శనమని దుయ్యబట్టారు. తెదేపాలో ఉన్నవారంతా మంచివారు.. బయటకు వెళ్లిపోయిన వారంతా చెడ్డవారు అన్నట్లుగా ఆ పార్టీ నేతలు వ్యవహరిస్తున్నారని మండిపడ్డారు. దళిత నాయకుడిని అవమానపరిచేలా మాట్లాడిన నేతలను వెంటనే అరెస్ట్ చేయాలని డిమాండ్ చేశారు.