భారత్‌తో పెర్త్ వేదికగా శుక్రవారం ఉదయం నుంచి ప్రారంభంకానున్న రెండో టెస్టు మ్యచ్‌కి తుది జట్టులో ఎలాంటి మార్పులు లేకుండా ఆస్ట్రేలియా జట్టు బరిలోకి దిగనుంది. అడిలైడ్ వేదికగా గత సోమవారం ముగిసిన తొలి టెస్టులో 31 పరుగుల తేడాతో ఓడిన ఆస్ట్రేలియా జట్టు.. రెండో టెస్టు కోసం మార్పులు చేస్తుందని అంతా భావించారు. ముఖ్యంగా.. అడిలైడ్‌లో ఘోరంగా విఫలమైన ఓపెనర్ అరోన్ ఫించ్, ఫాస్ట్ బౌలర్ మిచెల్ స్టార్క్‌పై ఆసీస్ వేటు వేయనుందనే వార్తలు కూడా వచ్చాయి. కానీ.. ఆస్ట్రేలియా క్రికెట్ బోర్డు మాత్రం.. అడిలైడ్‌లో ఆడిన జట్టే పెర్త్‌లోనూ బరిలోకి దిగనుందని ఈరోజు ప్రకటించింది. అడిలైడ్‌లో ఆడిన ఆస్ట్రేలియా జట్టు: అరోన్ ఫించ్, హారిస్, ఉస్మాన్ ఖవాజా, షాన్‌మార్ష్, హ్యాండ్స్‌కబ్, ట్రావిస్‌ హెడ్, టిమ్‌పైన్ (వికెట్ కీపర్, కెప్టెన్), పాట్ కమిన్స్, మిచెల్ స్టార్క్, నాథన్ లయన్, హేజిల్‌వుడ్ భారత్ జట్టులో మాత్రం పెర్త్ టెస్టుకి రెండు మార్పులు జరిగే అవకాశాలు కనిపిస్తున్నాయి. గాయపడిన రోహిత్ శర్మ, అశ్విన్ స్థానంలో హనుమ విహారి, జడేజా జట్టులోకి రానున్నారు. ఈరోజు 13 మందితో కూడిన భారత జట్టుని ప్రకటించిన బీసీసీఐ.. అదనంగా ఫాస్ట్ బౌలర్లు భువనేశ్వర్, ఉమేశ్ యాదవ్‌లని కూడా జట్టులోకి చేర్చింది. పెర్త్ పిచ్.. పేస్, బౌన్స్‌కి ఎక్కువగా అనకూలించనుందని వార్తలు వస్తున్న నేపథ్యంలో.. ఈ నిర్ణయం తీసుకున్నట్లు తెలుస్తోంది. బీసీసీఐ ప్రకటించిన భారత్ జట్టు ఇదే: విరాట్ కోహ్లి (కెప్టెన్), మురళీ విజయ్, కేఎల్ రాహుల్, చతేశ్వర్ పుజారా, అజింక్య రహానె (వైస్ కెప్టెన్), హనుమ విహారి, రిషబ్ పంత్ (వికెట్ కీపర్), రవీంద్ర జడేజా, ఇషాంత్ శర్మ, మహ్మద్ షమీ, జస్‌ప్రీత్ బుమ్రా, భువనేశ్వర్ కుమార్, ఉమేశ్ యాదవ్