కాశ్మీర్ లోయకు కొత్త అందాలు వచ్చాయి. మంచు దుప్పటి కప్పుకొని.. రోడ్లన్నీ శ్వేతవర్ణాన్ని అద్దుకున్నాయి. లోయలోని ఏ ప్రాంతం చూసినా హిమపాతమే కనిపిస్తోంది. శ్రీనగర్, రాజౌరి, సోన్‌మార్గ్, బందీపురాతో పాటూ చాలా ప్రాంతాల్లో రోడ్లపై మంచు పేరుకుపోయింది. రంగంలోకి దిగిన రెస్క్యూ టీమ్‌లు, యంత్రాల సాయంతో మంచును తొలగిస్తున్నాయి. అలాగే పలు ప్రాంతాల్లో విద్యుత్ సరఫరాకు, ట్రాఫిక్‌కు అంతరాయం ఏర్పడింది. మంచు దెబ్బకు చాలా జిల్లాల్లో జనజీవనం స్తంభించింది. వాహనాల రాకపోలకు ఇబ్బందులు ఎదురవుతున్నాయి. రెస్క్యూ టీమ్‌లు ఎప్పటికప్పడు మంచును తొలగిస్తున్నా.. ఇంకా కురుస్తూనే ఉంది. మంచుకు తోడు చల్లటి గాలులతో చిన్నపిల్లలు, సీనియర్ సిటిజన్లు వణికిపోతున్నారు. ఇళ్లలో నుంచి బయటకు రావాలంటే భయపడిపోతున్నారు. డిసెంబర్‌లోనే పరిస్థితి ఇలా ఉంటే.. జనవరిలో ఎలా ఉంటుందోనని వణుకుతున్నారు. బుధవారం నుంచి కురుస్తున్న మంచు దెబ్బకు జమ్మూ-శ్రీనగర్ హైవేపై వాహనాల రాకపోలకు అంతరాయం కలిగింది. మంచు భారీగా కురుస్తుండటంతో ట్రాఫిక్ కష్టాలు వెంటాడాయి. దీంతో హైవేను తాత్కాలికంగా మూసివేశారు. మంచును తొలగించిన హైవేను క్లియర్ చేసే పనిలో ఉన్నారు. రెస్క్యూ టీమ్‌లు మంచును తొలగించే పనిలో బిజీగా ఉన్నాయి.