రామ్‌ చరణ్, బోయపాటి శ్రీను కాంబినేషన్లో తెరకెక్కిన చిత్రం ‘వినయ విధేయ రామ’ యాక్షన్ ఎంటర్‌టైనర్‌గా తెరకెక్కుతున్న ఈ చిత్రం సంక్రాంతి కానుకగా ప్రేక్షకుల ముందుకు రానుంది. సంక్రాంతికి ఎక్కువ సినిమాలు విడుదల అవుతున్నందున ఈ సినిమా ప్రమోషన్స్ భారీగా చేయాలని మెగా ఫ్యాన్స్ కోరుతున్నారట. దీంతో నిర్మాత డీవీవీ దానయ్య ప్రీ రిలీజ్ వేడుకను అట్టహాసంగా నిర్వహించేందుకు సన్నాహాలు చేస్తున్నారట. ఈ కార్యక్రమానికి ‘ఆర్ ఆర్ ఆర్ ’ దర్శకుడు రాజమౌళి, రామ్‌చరణ్ కో స్టార్ ఎన్టీఆర్‌ను యూనిట్ ఆహ్వానించనున్నట్లు తెలుస్తోంది. మరో సర్‌ప్రైజ్ ఏంటంటే.. ప్రీ రిలీజ్ ఫంక్షన్‌కు టీఆర్ఎస్ వర్కింగ్ ప్రెసిడెంట్ కేటీఆర్‌ను కూడా ఆహ్వానించేందుకు నిర్మాత ప్లాన్ చేస్తున్నారట. తెలంగాణ అసెంబ్లీ ఎన్నికల్లో టీఆర్‌ఎస్ ఘనవిజయం సాధించడంతో పార్టీలో కేటీఆర్‌కు మరింత ప్రాధాన్యత పెరిగింది. దీనికి అనుగుణంగా ఆయన్ని వర్కింగ్ ప్రెసిడెంట్‌గా నియమిస్తూ కేసీఆర్ నిర్ణయం తీసుకున్నారు. మరోవైపు ఇటీవల జరిగిన ఎన్నికల్లో కూకట్‌పల్లి నియోజకవర్గం నుంచి ఎన్టీఆర్ సోదరి సుహాసిని పోటీ చేశారు. తన అక్కకు మద్దతుగా ప్రకటన విడుదల చేసిన ఎన్టీఆర్ ప్రచారంలో మాత్రం పాల్గొనలేదు. అయితే ఆ ఎన్నికల్లో ఆమె ఓడిపోయారు. ఇప్పుడు కేటీఆర్, ఎన్టీఆర్ ఒకే వేదికపై కనిపించనున్నారన్న వార్త సినీ, రాజకీయ వర్గాల్లో హాట్‌టాపిక్‌గా మారింది. కేటీఆర్.. రామ్‌చరణ్ స్నేహితులు, మరోవైపు ఆయన ఎన్టీఆర్‌తో కలిసి ‘ఆర్ ఆర్ ఆర్ ’తో నటిస్తున్నారు. మరి వీరిద్దరిని ఒకే వేదికపైకి తీసుకురావాలన్న మెగాపవర్‌స్టార్ ప్రయత్నం ఎంతవరకు ఫలిస్తుందో చూడాలి.