వైకుంఠ ఏకాదశిని పురస్కరించుకుని శ్రీవారి దర్శనానికి లక్షలాదిగా భక్తులు తరలివచ్చారు. ఆదివారం మధ్యాహ్నం నుంచే భక్తుల తాకిడి మొదలు కాగా, సోమవారం మధ్యాహ్నం 12 నుంచి భక్తులను క్యూలైన్‌లోకి దర్శనానికి అనుమతించారు. సోమవారం రాత్రి 9.30 గంటలకు ఏకాంత సేవ తర్వాత శ్రీవారి ఆలయ బంగారు వాకిళ్లను మూసివేశారు. అర్ధరాత్రి 12.05 గంటలకు తిరుప్పావై పఠన నివేదనతో స్వామివారికి మేల్కొలుపు సేవ నిర్వహించారు. ధనుర్మాసం కైంకర్యాలు పూర్తి చేసి.. వైకుంఠ ద్వారాలు తెరిచారు. వేకువజామున 1.30కు ప్రొటోకాల్‌ ప్రముఖులకు జారీ చేసిన వీఐపీ పాసులపై శ్రీవారి దర్శనం ప్రారంభించి హారతిలేని లఘు దర్శనం కల్పించారు. ఉదయం 5 గంటల తర్వాత శ్రీవారి ధర్మదర్శనం ప్రారంభించారు. శ్రీవారి సేవలో సుప్రీంకోర్టు, హైకోర్టు న్యాయమూర్తులు, వివిధ రాష్ట్రాల మంత్రులు, ఎంపీలు, ఎమ్మెల్యేలు, ఎమ్మెల్సీలు, ఉన్నతాధికారులు శ్రీవారిసేవలో పాల్గొన్నారు. సుప్రీంకోర్టు న్యాయమూర్తి జస్టిస్‌ ఎన్వీ రమణ, తెలుగు రాష్ట్రాల గవర్నర్ ఈఎస్‌ఎల్ నరసింహన్ దంపతులు, కర్ణాటక ముఖ్యమంత్రి కుమారస్వామి, మాజీ ప్రధాని దేవెగౌడ, ఏపీ ఉపముఖ్యమంత్రి కేఈ కృష్ణమూర్తి, మంత్రులు అచ్చెన్నాయుడు, ప్రత్తిపాటి పుల్లారావు, సోమిరెడ్డి చంద్రమోహన్ రెడ్డి, నక్కా ఆనంద్‌బాబు, తెలంగాణ ముఖ్యమంత్రి కేసీఆర్‌ సతీమణి శోభ, ఎమ్మెల్యే హరీశ్‌రావు, ఎంపీలు, ఎమ్మెల్యేలు, ఎమ్మెల్సీలు, ఉన్నతాధికారులు అధిక సంఖ్యలో తరలివచ్చారు. దీంతో దర్శనం పాసులు, వసతి గదుల కేటాయింపులో టీటీడీ ఉన్నతాధికారులపై ఒత్తిడి పెరిగింది. తణుకు మాజీ ఎమ్మెల్యే కారుమూరి నాగేశ్వరరావు తనకు తగిన గౌరవం ఇవ్వలేదంటూ జేఈవో శ్రీనివాసరాజుపై ఆగ్రహం వ్యక్తం చేయగా, మర్యాదగా మాట్లాడాలంటూ జేఈవో గట్టిగా బదులిచ్చారు. పలువురు ప్రజాప్రతినిధులు వసతి కేటాయింపు కేంద్రాల వద్ద ఆగ్రహంతో, అసంతృప్తితో కనిపించారు.