పవర్ స్టార్ పవన్ కళ్యాణ్ జనసేన పార్టీని ప్రకటించినప్పుడు ముందుగా సంతోషించింది ఆయన అభిమానులే. ఆంధ్రప్రదేశ్‌లో ఆయనకున్న అభిమాన గణం జనసేన జెండాలు పట్టుకుని జనసైనికులుగా మారిపోయారు. వాస్తవానికి ఈ అభిమానులే జనసేనాని బలం. ఆ బలంతోనే 2019లో ఏపీలోని అన్ని నియోజకవర్గాల్లో జనసేన పోటీకి దిగుతుందని పవన్ ప్రకటించారు. తాను కూడా పోటీచేస్తున్నానని చెప్పారు. పవన్ చేసిన ఈ ప్రకటన ఆయన అభిమానుల్లో మరింత ఉత్సాహాన్ని నింపింది. టీడీపీ నుంచి తెగతెంపులు చేసుకోవడం, జనసేన పోరాట యాత్ర పేరుతో ప్రజల మధ్య తిరగడం, వారి సమస్యలపై ప్రభుత్వాన్ని ప్రశ్నించడంతో తరవాత సీఎం పవన్ కళ్యాణే అంటూ ఆయన అభిమానులు ప్రచారం మొదలుపెట్టారు. ‘జనసేన కవాతు’ పేరుతో ధవళేశ్వరం బ్యారేజ్‌పై నిర్వహించిన పాదయాత్రను జనసైనికులే విజయవంతం చేశారు. అలాగే ఫేస్‌బుక్ లైవ్ లాంటి అధునాతన టెక్నాలజీని వాడుకొని ఇంటింటికీ జనసేన పార్టీని చేరువచేయడానికి, మేనిఫెస్టో, సిద్ధాంతాలు, ఆశయాలను తెలియజేడానికి వినూత్న రీతిలో రూపొందించిన ‘జనసేన తరంగం’ కార్యక్రమం కూడా జనసైనికుల వల్లే విజయవంతమైంది. మొత్తంగా చూసుకుంటే గ్రామ స్థాయి నుంచి పార్టీలో జనసైనికుల పాత్రే కీలకంగా ఉంది. అయితే క్షేత్ర స్థాయిలో తాము ఎవరితో నడవాలనే దానిపై జనసైనికుల్లో అనుమానాలున్నాయి. నియోజకవర్గ ఇన్‌ఛార్జిలను ప్రకటించకపోవడమే ఇందుకు కారణం. ఎన్నికల సమయంలో రాష్ట్ర వ్యాప్తంగా ఉన్న జనసైనికులను ఒక తాటిపైకి తీసుకొచ్చి నడిపించడమనేది అంత సులభమైన విషయం కాదు. ఓ రాజకీయ పార్టీని గ్రామ స్థాయి నుంచే పటిష్ఠం చేయడం చాలా ముఖ్యం. కనీసం గ్రామ స్థాయిలో కాకపోయినా నియోజకవర్గ స్థాయిలోనైనా సంస్థాగత లోపాలు లేకుండా చూసుకోవాలి. కానీ, జనసేన పార్టీకి ప్రస్తుతం అదే పెద్ద లోపంగా కనిపిస్తోంది. అసెంబ్లీ ఎన్నికలకు ఇంకో ఐదు నెలల సమయం మాత్రమే ఉండగా జనసేన పార్టీ మాత్రం నియోజకవర్గ స్థాయిలో ఇంకా ఎలాంటి కార్యచరణను రచించలేదు. పవన్ కళ్యాణ్ మీద ప్రేమతో పార్టీలో చేరిన కొంత మంది సొంతంగా చొరవ తీసుకొని నియోజకవర్గ స్థాయిలో పార్టీ బలోపేతానికి కృషి చేస్తున్నారు. ఉదాహరణకు నిడదవోలు నియోజకవర్గానికి చెందిన జనసేన నాయకుడు కస్తూరి సత్య ప్రసాద్(నాని) గ్రామ స్థాయిలో పార్టీని బలోపేతం చేయడానికి ‘రెడ్ రెవల్యూషన్’ అనే వినూత్న కార్యక్రమాన్ని చేపట్టారు. అలాగే గ్రామ సమస్యలు ముఖ్యమంత్రి చంద్రబాబు నాయుడుకు తెలిసేలా పోస్ట్ కార్డ్ ఉద్యమాన్ని చేపట్టారు. జనసేన కవాతులోనూ తన అనుచరులతో పాల్గొన్నారు. ప్రజల మధ్య తిరుగుతూ, వారి సమస్యలు తెలుసుకుంటున్నారు.పవన్ కళ్యాణ్‌పై అభిమానంతో, జనసేన ఎమ్మెల్యే సీటు ఆశించి నాని ఇదంతా చేస్తున్నారనడంలో ఎలాంటి సందేహం లేదు. అయితే, ఇప్పుడు నానికి మరో స్థానిక నేత నుంచి పోటీ ఎదురవుతోంది. ఆయన కూడా జనసేన కార్యక్రమాల్లో చురుగ్గా పాల్గొంటూ తన ఉనికిని చాటే ప్రయత్నం చేస్తున్నారు. దీంతో నియోజకవర్గంలోని జనసైనికులు ఎవరిని తమ నాయకుడిగా భావించాలో తెలియక తర్జనభర్జన పడుతున్నారు. ఈ పరిస్థితి కేవలం నిడదవోలు నియోజకవర్గంలోనే కాదు.. రాష్ట్రంలోని చాలా చోట్ల ఉంది. అసెంబ్లీ ఎన్నికలు దగ్గరపడుతున్న తరుణంలో నియోజకవర్గ స్థాయిలో పార్టీని నడిపించే నాయకుడు ఎవరో తెలియక జనసైనికులు ఆందోళన వ్యక్తం చేస్తున్నారు. ఇద్దరు ముగ్గురు నేతలు నాయకత్వం కోసం పోటీ పడుతుండటంతో ఎవరి వెనక వెళ్లాలో తెలియక అయోమయ స్థితిలో పడిపోతున్నారు. మొత్తం 175 నియోజకవర్గాల్లో పోటీ చేస్తామని చెప్పిన జనసేనాని ప్రస్తుతం తూర్పుగోదావరి జిల్లా ముమ్మిడివరం స్థానానికి మాత్రమే అభ్యర్థిని ఖరారు చేశారు. మిగిలిన నియోజకవర్గాల్లో కీలక నేతలు ఎవరో ఇప్పటికీ స్పష్టత లేదు. ఎన్నికలు దగ్గరపడుతున్న వేళ సంస్థాగత సమస్యలపై పవన్ కళ్యాణ్ దృష్టి సారించి క్షేత్ర స్థాయి నుంచే పార్టీని బలోపేతం చేయాలని పలువురు అభిప్రాయపడుతున్నారు.