సాధారణ దగ్గు, జ్వరం లక్షణాలే స్వైన్ ఫ్లూ వ్యాధికి ఉంటాయి. అనుమానం వస్తే వెంటనే వైద్య పరీక్షలు చేసుకోవాలి. ఈ జాగ్రత్తలు పాటించాలి.

తెలుగు రాష్ట్రాల్లో ఒక్కసారిగా మారిన వాతావరణంతో స్వైన్‌ ఫ్లూ పంజా విసుతుతోంది. ఈ ప్రాణాంతక వ్యాధి కారక హెచ్‌1ఎన్‌1 వైరస్‌ ఒక్కసారిగా జడలు విప్పింది. తెలుగు రాష్ట్రాల ప్రజలను చలి కంటే ఎక్కువగా స్వైన్‌ ఫ్లూ భూతం వణికిస్తోంది. సికింద్రాబాద్‌లోని గాంధీ ఆసుపత్రిలో స్వైన్‌ ఫ్లూతో చికిత్స పొందుతూ మరణిస్తున్న వారి సంఖ్య అంతకంతకూ పెరుగుతోంది. అటు ఏపీలోనూ స్వైన్ ఫ్లూ కేసులు పెరుగుతుండటం ఆందోళన కలిగిస్తోంది. దీంతో సాధారణ జ్వరం బారిన పడినా.. ప్రజలు భయంతో ఆస్పత్రులకు పరుగు తీస్తున్నారు. సాధారణ జలుబు లాంటి లక్షణాలే స్వైన్ ఫ్లూ వ్యాధికి కూడా ఉండటం ఇందుక్కారణం. ఈ నేపథ్యంలో స్వైన్ ఫ్లూ లక్షణాలేంటి? వ్యాధి వ్యాపించకుండా ఎలాంటి జాగ్రత్తలు తీసుకోవాలో తెలుసుకుందాం. 

స్వైన్ ఫ్లూ.. గాలి ద్వారా ఒకరి నుంచి మరొకరికి వ్యాపిస్తుంది. రోగులు దగ్గినా, తుమ్మినా వైరస్ గాలిలో కలుస్తుంది. ఆ గాలిని పీలిస్తే ఇతరులకూ సోకుతుంది. రోగులు దగ్గినప్పుడు, తుమ్మినపుడు వెలువడే తుంపర్లు పడిన చోట కూడా వైరస్ అంటుకొని ఉంటుంది. పొరపాటున అలాంటి వాటిని ముట్టుకున్న చేతితో నోరు, ముక్కు, కళ్లను రుద్దుకుంటే.. మనకూ సోకుతుంది. 

స్వైన్ ఫ్లూ ప్రధాన లక్షణాలు.. 

జ్వరం, తలనొప్పి, తీవ్రమైన గొంతునొప్పి.

ముక్కు దిబ్బడ, ముక్కు కారటం కూడా ఉంటాయి.

జ్వరానికి తోడు దగ్గు, ఒళ్లు నొప్పులు, తీవ్రమైన నీరసం.

కొంత మందికి వాంతులు, విరేచనాలు కూడా కావొచ్చు.

మొదట ఇది మామూలు జ్వరం మాదిరిగానే ప్రారంభమవుతుంది. ఆ తర్వాత లక్షణాలు తీవ్రమవుతాయి.

లక్షణాలు తీవ్రంగా ఉన్నా.. తగిన చికిత్స తీసుకోకపోతే వ్యాధి తీవ్రమయ్యే ప్రమాదం ఉంటుంది. స్వైన్ ఫ్లూ మరణాలకు చాలా వరకూ ఇదే కారణం.

 

హెచ్1 ఎన్1 వైరస్ రక్తంలో ఉండదు. శ్వాసకోశ అవయవాల్లో ఉంటుంది. అందువల్ల డాక్టర్లు.. ముక్కు లేదా నోటి నుంచి దూదిపుల్లతో స్రావాలను తీసి పరీక్షిస్తారు. స్వైన్ ఫ్లూ పరీక్షను ప్రత్యేక ప్రయోగశాలల్లో మాత్రమే నిర్వహిస్తారు. 

తీసుకోవాల్సిన జాగ్రత్తలు: 

మనలో చాలా మంది ఫ్లూ చలికాలంలోనే వస్తుందని అనుకుంటారు. కానీ, ఫ్లూ జ్వరాలు ఏ కాలంలోనైనా రావొచ్చు. చలికాలంలో తక్కువ ఉష్ణోగ్రతల కారణంగా ఫ్లూ కారక వైరస్ గాలిలో ఎక్కువ కాలం బతికి ఉంటుంది. అందువల్ల వ్యాధి ఎక్కువగా వ్యాపించే ప్రమాదం ఉంటుంది.

స్వైన్ ఫ్లూ విజృంభిస్తున్న సమయంలో.. పనుల నిమిత్తం బయటకు వెళ్లేవాళ్లు తప్పనిసరిగా తగిన జాగ్రత్తలు తీసుకోవాలి. నోటికి అడ్డంగా రుమాలు చుట్టుకోవటం మరవవద్దు.

జ్వరంతో పాటు తలనొప్పి, గొంతు నొప్పి, దగ్గు, ఒంటి నొప్పులు, తీవ్రమైన నీరసం ఉంటే.. వెంటనే వైద్యులను సంప్రదించి తగిన పరీక్షలు చేయించుకోవాలి.

కుటుంబ సభ్యులు, బంధువులెవరైనా స్వైన్ ఫ్లూ బారిన పడితే మిగిలినవాళ్లు అప్రమత్తంగా ఉండాలి. రోగికి చికిత్స అందిస్తూనే సొంత రక్షణ చర్యలు పాటించాలి.

స్వైన్ ఫ్లూ బారిన పడ్డవారు ముక్కుకు, నోటికి రుమాలు లాంటివి అడ్డం పెట్టుకోవటం మరిచిపోవద్దు. తద్వారా ఈ జబ్బును ఇతరులకు వ్యాపించకుండా చాలా వరకూ నివారించినవారవుతారు.

స్వైన్‌ ఫ్లూ వార్డుల్లో సేవలందించే వైద్యులు, నర్సులు, ఇతర సహాయక సిబ్బంది కూడా తగిన ముందు జాగ్రత్త చర్యలు తీసుకోవాలి.

గర్భిణులకు మరింత జాగ్రత్త.. 

గర్భిణులు, ఐదేళ్లలోపు పిల్లలు, 65 ఏళ్లు పైబడిన వృద్ధులు, దీర్ఘకాలిక వ్యాధిగ్రస్థులు.. ముందస్తు జాగ్రత్తలు తీసుకోవాలి.

వ్యాధి పంజా విసురుతున్న సమయంలో తప్పనిసరి అయితే గానీ, ఆరుబయటకు వెళ్లవద్దు. దగ్గినప్పుడు, తుమ్మినప్పుడు ముఖానికి అడ్డంగా వస్త్రం పెట్టుకోవాలి. తరచూ చేతులను శుభ్రంగా కడుక్కోవాలి.

మాత్రం అనుమానం వచ్చినా తక్షణమే వైద్యులను సంప్రదించాలి.

రోగ నిరోధక శక్తి బలంగా ఉంటే.. 

మనలో రోగ నిరోధక శక్తి బలంగా ఉంటే ఎలాంటి వ్యాధి సోకే ప్రమాదాలైనా తక్కువగా ఉంటాయి. కాబట్టి రోగ నిరోధక శక్తి పెంచుకోవడానికి నిత్యం ప్రయత్నం చేయాలి. సమతుల ఆహారం తీసుకోవడం, వేళకు భోంచేయడం, తగినంత నిద్ర ఉండేలా చూసుకోవాలి. దీనికి తోడు వ్యాయామం తప్పనిసరి. జ్యూస్, పండ్లు ఎక్కువగా తీసుకుంటే.. రోగ నిరోధకశక్తి బాగా వృద్ధి చెందుతుంది. అప్పుడు వైరస్ ఒంట్లోకి ప్రవేశించినా.. మన శరీరం దాన్ని సమర్థంగా ఎదుర్కోగలుగుతుంది. గర్భిణులు, వయసు పైబడిన వారికి వ్యాధి ఎక్కువగా సోకడానికి ప్రధాన కారణం.. వారిలో రోగ నిరోధక శక్తి తక్కువగా ఉండటమే.