హైపర్ ఆది... బుల్లితెర ప్రేక్షకులకు పరిచయం అక్కర్లేని పేరు. ఈటీవీలో ప్రసారమయ్యే ’జబర్దస్త్‌’ కార్యక్రమంలో ఆయన చేసే హడావుడి అంతాఇంతా కాదు. ఎదుటివారిపై పంచ్‌ల వర్షం కురిపిస్తూ ‘హైపర్ ఆది’గా ఫేమస్ అయిపోయాడు. ముఖ్యంగా రైజింగ్ రాజు, శాంతిస్వరూప్‌లపై ఆయన వేసే పంచ్‌లకు పొట్ట చెక్కలవ్వాల్సిందే. అయితే కొంతకాలంగా ఆది ‘జబర్దస్’లో కనిపించకపోవడంతో బుల్లితెర ప్రేక్షకులంతా నిరాశకు గురవుతున్నారు. ఆదికి యాక్సిడెంట్ అయిందని, పెళ్లి చేసుకున్నాడని, పవన్‌కళ్యాణ్ అభిమాని కావడంతో జనసేన పార్టీలో చేరుతున్నాడని.. ఇలా ఎవరికి తోచినట్టుగా వారు ప్రచారం చేశారు. అయితే ఆ వార్తలన్నింటిని ఆది తాజాగా కొట్టిపడేశారు. తాజాగా ఓ యూట్యూబ్ ఛానల్‌కు ఇచ్చిన ఇంటర్వ్యూలో తాను జబర్దస్త్‌కు ఎందుకు దూరం కావాల్సి వచ్చిందో ఆది చెప్పారు. షూటింగులతో పాటు కొన్న వ్యక్తిగత పనుల ఒత్తిడి కారణంగానే బజర్దస్త్‌కు దూరమయ్యాయని, ఫిబ్రవరి నుంచి మళ్లీ జబర్దస్త్ టీమ్‌తో జాయిన్ అవుతానని చెప్పారు. కాలేజీలో ఉన్నప్పుడు జబర్దస్త్ చూసేవాడినని.. కానీ ఎప్పుడూ తాను ఇంతవరకు వస్తానని అనుకోలేదని చెప్పుకొచ్చారు. ప్రస్తుతం మిస్టర్ మజ్ను, చిత్రలహరి చిత్రాల్లో కీలక పాత్రల్లో నటిస్తున్నట్లు తెలిపారు. పవన్‌కళ్యాణ్‌ను విమర్శించినందుకే కత్తి మహేష్‌తో గొడపపడ్డానని, అంతకుమించి ఆయనతో ఎలాంటి శత్రుత్వం లేదని ఆది తెలిపారు. ఆ వివాదం తర్వాత తామిద్దరం మళ్లీ కలుసుకోలేదన్నారు. తనకు ఊహ తెలిసినప్పటి నుంచి చిరంజీవికి అభిమానినని, అందుకే జబర్దస్త్‌లో మెగా ఫ్యామిలీకి సంబంధించి డైలాగులే ఎక్కువగా చెబుతానని, ఆ పాటలకే డ్యాన్సులు చేస్తానని చెప్పారు. తాను పవన్‌కు పిచ్చి అభిమానినని, ఓ వ్యక్తిగా ఆయన్ని సపోర్ట్ చేస్తానని చెప్పారు. అయితే జనసేన పార్టీలో చేరే ఆలోచనేదీ తనకు లేదన్నారు. అన్నం దానం చేసేవారిని అన్నదాత, చదువు దానం చేసేవారిని గురువు అన్నట్లుగానే ప్రజల కోసం భవిష్యత్‌ను దానం చేసేవారిని పవన్‌కళ్యాణ్ అంటారని ఆది అన్నారు. పవన్ గురించి తెలుసుకున్న ఎవరైనా ఆయనకు సపోర్ట్ చేయకుండా ఉండలేరని పేర్కొన్నారు.