గ్యాంగ్‌స్టర్ సోహ్రబుద్దీన్ నకిలీ ఎన్‌కౌంటర్ కేసులో సీబీఐ న్యాయస్థానం శుక్రవారం సంచలన తీర్పును వెలువరించింది. ఈ కేసులో 22 మంది నిందితులను నిర్దోషులుగా ముంబైలోని సీబీఐ ప్రత్యేక కోర్టు ప్రకటించింది. ఈ కేసులో ప్రాసిక్యూషన్ సరైన ఆధారాలను సమర్పించలేకపోయిందని, అందుకే ఈ కేసును కొట్టేస్తున్నామని న్యాయమూర్తి జస్టిస్ ఎస్జే శర్మ తెలిపారు. ఈ కేసులో 210 మంది వాంగ్మూలం ఇవ్వగా, విచారణ సమయంలో 92 మంది మాట మార్చారని కోర్టు చెప్పింది. నవంబర్ 23, 2005న సోహ్రబుద్దీన్ షేక్, ఆయన భార్య కౌసర్ బీలను గుజరాత్ పోలీసులు ఎన్ కౌంటర్ చేశారు. ఇది జరిగిన ఏడాది తర్వాత డిసెంబరు 2006లో సోహ్రబుద్దీన్ ప్రధాన అనుచరుడు తులసీరాం ప్రజాపతిని రాజస్థాన్, గుజరాత్ పోలీసులు సంయుక్తంగా హతమార్చారు. అయితే నేరాల అణచివేత విషయంలో గుజరాత్‌ను దేశానికి ఓ మోడల్‌గా చూపించడానికే ఈ నకిలీ ఎన్‌కౌంటర్లు జరిగాయనే ఆరోపణలు వెల్లువెత్తాయి. ఈ ఎన్‌కౌంటర్లను సాకుగా చూపించి బీజేపీపై కాంగ్రెస్ సహా మిగతా ప్రతిపక్షాలు ఇన్నాళ్లు విమర్శలు గుప్పించాయి. ఈ నేపథ్యంలో నాటి గుజరాత్ హోంమంత్రి, ప్రస్తుత బీజేపీ జాతీయ అధ్యక్షుడు అమిత్ షా, రాజస్థాన్ హోంమంత్రి గులాబ్ చంద్ కటారియా సహా 23 మందిపై కేసు నమోదయ్యింది. అయితే అమిత్ షాను సీబీఐ కోర్టు ఇంతకు ముందే నిర్దోషిగా ప్రకటించింది. తాజాగా మిగతా 22 మందిని నిందితులను నిర్దోషులుగా పేర్కొంటూ ఉత్తర్వులు జారీచేసింది. వీరిలో గుజరాత్, రాజస్థాన్, ఆంధ్రప్రదేశ్‌లకు కిందిస్థాయి పోలీసు అధికారులు ఉన్నారు. ఈ తీర్పుతో సాధారణ ఎన్నికలకు ముందు బీజేపీకి కొంత ఊరట లభించింది. సోహ్రబుద్దీన్ షేక్ తన భార్య కౌసర్ బీతో కలిసి 2005 నవంబరు 23న మహారాష్ట్రలోని సంగ్లీకి వెళ్లుండగా, హైదరాబాద్ సమీపంలో గుజరాత్ ఏటీఎస్ టీమ్ పట్టుకున్నారు. అనంతరం వారిని అహ్మదాబాద్‌కు తీసుకెళ్లి నవంబరు 26న సోహ్రబుద్దీన్‌ను కాల్చి చంపారని, ఇది జరిగిన తర్వాత కౌసర్ బీ గుజరాత్‌లోని ఇల్లాలో గ్రామం నదీతీరంలో సగం కాలిన శవమై కనిపించింది.