పెథాయ్ తుఫాను ప్రభావంతో తెలుగు రాష్ట్రాల్లో ఉష్ణోగ్రతలు గణనీయంగా పడిపోయాయి. శీతల పవనాలకు తోడు బంగాళాఖాతంలో ఏర్పడిన తుఫానుతో తేమ గాలులు వీయడం వల్ల చలి తీవ్రత పెరిగింది. మూడు రోజుల పాటు గజగజ వణికించిన చలి గురువారం కాస్తా తగ్గింది. రెండు రోజుల్లోనే చలికి ఏపీ, తెలంగాణలో సుమారు 70 మంది మృత్యువాత‌పడ్డారు. తుఫాను దెబ్బకు మబ్బుల చాటున దాక్కున్న సూరీడు దర్శనమిచ్చినా ఆదిలాబాద్ జిల్లాను చలి వెంటాడుతోంది. శీతల గాలులు వీయడంతో రోజురోజుకు ఉష్ణోగ్రతలు పడిపోతున్నాయి. డిసెంబరు 15న కనిష్ట ఉష్ణోగ్రత 10.8 డిగ్రీలు నమోదు కాగా.. ఆ తర్వాత క్రమంగా తగ్గుతూ వచ్చింది. గురువారం నాడు రికార్డు స్థాయిలో అత్యల్పంగా 4.8 డిగ్రీల సెల్సియస్‌ ఉష్ణోగ్రత నమోదైంది. మరో మూడ్రోజుల పాటు శీతల పవనాలు వీస్తాయని, కనిష్ఠ ఉష్ణోగ్రతలు మరింతగా పడిపోతాయని వాతావరణ శాఖ నిపుణులు పేర్కొన్నారు. చలి కారణంగా పిల్లలు, వృద్ధులు తగిన జాగ్రత్తలు తీసుకోవాలని వైద్యులు సూచిస్తున్నారు. చల్లటి వాతావరణం స్వైన్‌ఫ్లూ వ్యాపించడానికి మరింత అనుకూలంగా ఉంటుందని, అప్రమత్తంగా ఉండాలని హెచ్చరిస్తున్నారు. బయటకు వెళ్లేటప్పుడు మాస్క్‌లు ధరించాలని, ముఖ్యంగా జాగింగ్, వాకింగ్‌కు వెళ్లేవారు వైరల్ వ్యాధులు భారినపడే ఆస్కారం ఉందని, తగిన జాగ్రత్తలు తీసుకోవాలని అంటున్నారు. వైరస్ విజృంభిస్తుండటంతో చిన్నారులు, గర్భిణులు, వయసు మళ్లినవారు వివిధ వ్యాధుల బారిన పడుతున్నారు. సాధారణంగా డిసెంబరులో ఉత్తరాది నుంచి శీతలగాలులు వీస్తుంటాయి. ఈ గాలుల వేగం గంటకు 10 కి.మీ. నుంచి 15 కి.మీ. వరకు ఉంటుంది. ఈ కాలంలో వీచే గాలుల్లో అసాధారణ వేగం ఉండదు. కానీ, పెథాయ్ తుఫాన్ కారణంగా బంగాళాఖాతం నుంచి గంటకు 60-70 కి.మీ. వేగంతో బలమైన తేమ గాలులు వీచాయి. ఇదే సమయంలో ఉత్తరాది నుంచి వచ్చే శీతలగాలుల వల్ల ఒక్కసారిగా తెలంగాణ, ఏపీ ప్రాంతాల్లో వాతావరణం బాగా చల్లబడింది.