‘ఆకు చాటు పింద తడిసె.. కొమ్మ చాటు పువ్వు తడిసె’.. వేటగాడు చిత్రంలోని ఈ పాట తెలుగు సినిమా సంగీత ప్రపంచంలో అజరామరం. ఇందులో ఇందులో అన్నగారు ఎన్టీఆర్ బెల్ బోటమ్ ఫ్యాంట్‌లో సిగ్నేచర్ స్టెప్స్‌‌తో అదరగొడితే.. అందాలనటి, అతిలోక సుందరి శ్రీదేవి.. తెల్లటి చీరను కట్టి ఎంత చూసిన తనివితీరని అందచందాలను వర్షానికి ఎరగా పెట్టి ఆడిపాడిన ఈ పాటలో శ్రీదేవి తప్ప మరొకర్ని ఊహించుకోలేము. విశ్వ విఖ్యాత నట సార్వభౌమ స్వర్గీయ నందమూరి తారక రామారావు జీవిత కథ ఆధారంగా తెరకెక్కిన ‘ఎన్టీఆర్ బయోపిక్’ మూవీలో జూనియర్ శ్రీదేవిగా రకుల్ ప్రీత్ సింగ్.. ఎన్టీఆర్ పాత్రధారి బాలయ్యతో కలిసి ‘ఆకు చాటు పింద తడిసె’ అంటూ స్టెప్పులు వేయనున్న విషయం తెలిసిందే. ఎన్టీఆర్-శ్రీదేవి కాంబినేషన్‌లో దాదాపు 14 సినిమాలు రావడంతో అందులో చాలా వరకూ బ్లాక్ బస్టర్ హిట్లు ఉండటంతో ఎన్టీఆర్ బయోపిక్‌లోని తొలిపార్ట్ ‘కథానాయకుడు’లో శ్రీదేవి పాత్ర కీలకం కానుంది. జనవరి 9న ప్రేక్షకుల ముందుకు వస్తున్న ఈ మూవీ ప్రమోషన్స్‌లో భాగంగా శుక్రవారం నాడు హైదరాబాద్‌లో ఈ మూవీ ఆడియో వేడుకను సినీ ప్రముఖుల మధ్య అంగరంగ వైభవంగా నిర్వహించారు. ఆ వేడుకలో బంగారు వర్ణపు డిజైనర్ శారీలో ప్రత్యేక ఆకర్షణగా నిలిచింది రకుల్ ప్రీత్ సింగ్. ఈ సందర్భంగా ఆమె మాట్లాడుతూ.. తనను నమ్మి ప్రతిష్టాత్మక ప్రాజెక్టులో భాగం చేసినందుకు చాలా సంతోషంగా ఉందన్నారు. వాస్తవానికి సినిమాలలో బాలకృష్ణగారు శ్రీదేవిగారితో నటించలేదు కాని.. ఎన్టీఆర్ బయోపిక్‌లో నా పాత్ర ద్వారా అది సాధ్యమైందంటూ ఆసక్తికర కామెంట్స్ చేశారు రకుల్.