విభజన చట్టంలో పేర్కొన్న హామీల అమలు విషయంలో కేంద్రం పాతపాటే పాడుతోంది. పార్లమెంటులో ఎప్పుడు వీటిపై నిలదీసినా చూస్తున్నాం, చేస్తున్నాం అంటూనే నిర్లక్ష్యపూరిత సమాధానాలతో కాలం గడిపేస్తోంది. తాజాగా, విశాఖ రైల్వేజోన్‌ ఏర్పాటుపై టీడీపీ సభ్యుడు శుక్రవారం రాజ్యసభలో అడిగిన ప్రశ్నకు పాతపాటే వల్లెవేసింది. జోన్‌ అంశాన్ని రైల్వే మంత్రిత్వశాఖ పరిశీలిస్తోందని తెలిపింది. రైల్వేజోన్‌ ఏర్పాటు తాజా పరిస్థితి తెలియజేయాలని ఎంపీ సుజనాచౌదరి అడిగిన ప్రశ్నకు రైల్వే మంత్రి పీయూష్‌ గోయెల్‌ లిఖితపూర్వక సమాధానం ఇచ్చారు. ఆంధ్రప్రదేశ్‌లో రైల్వేజోన్‌ ఏర్పాటుపై సాధ్యాసాధ్యాలు పరిశీలించాల్సి ఉందని, సీనియర్‌ రైల్వే అధికారులతో ఓ కమిటీ నియమించామని పేర్కొన్నారు. ఎంపీలు, రాష్ట్ర ప్రభుత్వాలు సహా భాగస్వాములతో ఈ కమిటీ చర్చించి ఓ నివేదిక అందజేసిందని, ఇది కేంద్ర రైల్వే మంత్రిత్వశాఖ పరిశీలనలో ఉందని పీయూష్‌ గోయెల్‌ తెలిపారు. జనవరి నుంచి విశాఖ-యశ్వంతపూర్ వరకు వారానికి ఒకసారి ప్రత్యేక రైలును పునఃప్రారంభించాలని నిర్ణయించినట్టు పీయూష్ గోయల్ వెల్లడించారు.ఇక, హైకోర్టు భవనం నిర్మాణంపై కూడా టీడీపీకి చెందిన మరో రాజ్యసభ సభ్యుడు రవీంద్రకుమార్ అడిగిన ప్రశ్నకు కేంద్ర న్యాయ శాఖ మంత్రి రవిశంకర్ ప్రసాద్ సమాధానం ఇచ్చారు. ఉమ్మడి హైకోర్టు పరిధిలో 79 భవనాలు నిర్మాణంలో ఉన్నాయని, ప్రస్తుతం ఆంధ్రప్రదేశ్‌, తెలంగాణల్లో 890 మంది న్యాయాధికారులు పనిచేస్తుండగా 1,045 కోర్టు భవనాలు అందుబాటులో ఉన్నాయని తెలిపారు. అలాగే విశాఖపట్నంలో ఇన్ఫర్మేషన్‌ టెక్నాలజీ ఇన్వెస్ట్‌మెంట్‌ రీజియన్‌  ఏర్పాటు ప్రతిపాదన ముగిసిన అధ్యాయమని స్పష్టం చేసింది. వైసీపీ ఎంపీ విజయసాయిరెడ్డి అడిగిన ప్రశ్నకు ఐటీ మంత్రి రవిశంకర్‌ ప్రసాద్‌ పై విధంగా స్పందించారు.