వచ్చే ఏడాదిలో జరిగే లోక్‌సభ ఎన్నికల్లో అన్ని స్థానాలకు ఎంఎన్‌ఎం పార్టీ పోటీ చేస్తుందని  ఎంఎన్‌ఎం అధినేత, ప్రముఖ సినీ నటుడు కమల్‌హాసన్‌ స్పష్టం చేశారు. చెన్నైలో జరిగిన విలేకరుల సమావేశంలో మాట్లాడుతూ కమల్‌ ఈ విషయాన్ని వెల్లడించారు.‘2019 లోక్‌సభ ఎన్నికల్లో తప్పకుండా పోటీ చేస్తా. మక్కల్‌ నీది మయ్యం(ఎంఎన్‌ఎం) పార్టీ అభ్యర్థులను ఖరారు చేసేందుకు త్వరలోనే కమిటీని ఏర్పాటుచేయనున్నాం’ అని కమల్‌ తెలిపారు. తమిళనాడు అభివృద్ధే ధ్యేయంగా తమ పార్టీ ప్రచారం చేస్తోందన్నారు. ఈ సందర్భంగా పొత్తుల అంశాన్ని కూడా ఆయన ప్రస్తావించారు. కూటముల గురించే ఇప్పుడే చెప్పలేమని, అయితే తమిళనాడు డీఎన్‌ఏను మార్చేందుకు ప్రయత్నించే ఏ పార్టీతోనూ తాము పొత్తు పెట్టుకోబోమని కమల్‌ స్పష్టంచేశారు. ఈ ఏడాది ఫిబ్రవరిలో కమల్‌హాసన్‌ మక్కల్‌ నీది మయ్యం పార్టీని ప్రారంభించిన విషయం తెలిసిందే. లోక్‌సభ ఎన్నికల్లో పోటీ చేసే యోచనలో ఉన్నట్లు గత కొంతకాలంగా చెబుతూ వస్తోన్న కమల్‌ ఆ అంశంపై ఈ రోజు ఓ స్పష్టత ఇచ్చారు.