టీటీడీ పరిధిలోని దేవాలయాల్లో అర్చకులకు ఈ ఏడాది మే నుంచి వయోపరిమితి నిబంధనలను అమల్లోకి తీసుకొచ్చి 65 ఏళ్లు పైబడివారిని తొలగించిన విషయం తెలిసిందే. దీంతో, 65 ఏళ్లు నిండాయన్న కారణంగా తమను విధుల నుంచి తప్పించాన్ని సవాల్ చేస్తూ తిరుచానూరు శ్రీపద్మావతి అమ్మవారి ఆలయ అర్చకులు హైకోర్టును ఆశ్రయించారు. దీనిపై విచారణ చేపట్టిన ఉమ్మడి హైకోర్టు మిరాశీ అర్చకులకు అనుకూలంగా తీర్పు వెలువరించింది. ఈ తీర్పు ఆధారంగా శ్రీవారి ఆలయం మాజీ ప్రధాన అర్చకుడు రమణ దీక్షితులు తనను తిరిగి విధుల్లోకి తీసుకోవాలని డిమాండ్ చేస్తున్నారు. హైకోర్టు తీర్పును తన విషయంలోనూ అమలు చేయాలని ఆయన కోరుతున్నారు. ఈ విషయంపై సోమవారం టీటీడీ ఈవో అనిల్ కుమార్ సింఘాల్ కు లేఖ రాశారు. తనను వెంటనే విధుల్లోకి తీసుకోవాలని తన లేఖలో కోరారు. మిరాశీ అర్చకులను వెంటనే విధుల్లోకి తీసుకోవాలని హైకోర్టు ఇచ్చిన తీర్పును తనకు వర్తింపజేయాలని విజ్ఞప్తి చేశారు. 65 ఏళ్లు పూర్తయిన అర్చకులకు విశ్రాంతి ఇవ్వాలనీ, కొత్తవారిని తీసుకోవాలని టీటీడీ గతంలో నిర్ణయించింది. ఈ మేరకు పాలకమండలి నిర్ణయం తీసుకోవడంతో గత మే నెలలో రమణ దీక్షితులతో పాటు మరికొందరు అర్చకులను విధుల నుంచి తప్పించారు. దీనిపై రమణ దీక్షితులు విమర్శలు గుప్పించడమే కాదు, ప్రభుత్వం సంచలన ఆరోపణలు చేశారు. శ్రీవారి విలువైన సంపద విదేశాలకు తరలిపోయిదంటూ మీడియా సమావేశాలు నిర్వహించి ఆరోపించారు. ప్రధాని, బీజేపీ జాతీయ అధ్యక్షుడు అమిత్ షాలను కూడా కలిసి ప్రభుత్వంపై ఫిర్యాదు చేశారు. తాజాగా హైకోర్టు తీర్పుతో తనను విధుల్లోకి తీసుకోవాలంటూ రమణదీక్షితులు లేఖ రాశారు. మరోవైపు, హైకోర్టు తీర్పును పరిశీలించిన అనంతరం సుప్రీంకోర్టుకు వెళ్లాలని టీటీడీ భావిస్తోంది. ఇందుకోసం ప్రాథమికంగా కసరత్తు ప్రారంభించింది. పద్మావతి అమ్మవారి ఆలయ అర్చకులకు అనుకూలంగా తీర్పు వచ్చిన నేపథ్యంలో శ్రీవారి ఆలయ అర్చకులకూ వయోపరిమితి నిబంధన ఎత్తివేయాల్సిన పరిస్థితి రావొచ్చన్న చర్చ మొదలైంది. దీన్ని ఎలా అధిగమించాలన్నదే ప్రస్తుతం టీటీడీ ముందున్న సవాల్. తీర్పు వెంటనే అమలులోకి వచ్చే పక్షంలో.. ఇటీవల నియమితులైన ప్రధాన అర్చకుల భవితవ్యంపై కూడా ప్రభావం చూపనుంది.