ఆస్ట్రేలియాతో మెల్‌బోర్న్ వేదికగా బుధవారం నుంచి జరగనున్న మూడో టెస్టు మ్యాచ్ కోసం 11 మందితో కూడిన భారత తుది జట్టుని బీసీసీఐ ఈరోజు ప్రకటించింది. తొలి రెండు టెస్టుల్లో పేలవంగా విఫలమైన ఓపెనర్లు కేఎల్ రాహుల్, మురళీ విజయ్‌పై వేటు పడగా.. యువ ఓపెనర్ మయాంక్ అగర్వాల్‌కి ఈ జట్టులో అవకాశం లభించింది. గత ఏడాది కాలంగా దేశవాళీ క్రికెట్‌లో పరుగుల వరద పారించిన ఈ ఓపెనర్‌.. దాదాపు ఆరునెలల నిరీక్షణ తర్వాత టీమిండియాలోకి అరంగేట్రం చేయబోతున్నాడు. అయితే.. అతనితో పాటు ఓపెనర్‌గా ఎవరు బరిలోకి దిగుతారు..? అనే దానిపై స్పష్టత రావడం లేదు. హనుమ విహారి, రోహిత్ శర్మ పేర్లు వినిపిస్తున్నా.. మైదానంలోకి దిగే వరకూ ఓ అంచనాకి రాలేని పరిస్థితి ఏర్పడింది. గాయం కారణంగా రెండో టెస్టుకి దూరమైన రోహిత్ శర్మ మళ్లీ జట్టులో చోటు దక్కించుకోగా.. రవీంద్ర జడేజా కూడా సుదీర్ఘ ఫార్మాట్‌లోకి పునరాగమం చేశాడు. ఇక పెర్త్ టెస్టులో చెప్పుకోదగ్గ స్థాయిలో రాణించలేకపోయినా.. తెలుగు క్రికెటర్‌ హనుమ విహారికి మరోసారి అవకాశం లభించింది. మొత్తంగా.. రెండో టెస్టు ఆడిన జట్టులో రెండు మార్పులు చోటు చేసుకున్నాయి. కేఎల్ రాహుల్, మురళీ విజయ్ స్థానాల్లో రోహిత్ శర్మ, జడేజా జట్టులోకి వచ్చారు. మరోవైపు ఆస్ట్రేలియా జట్టులోనూ ఒక మార్పు జరిగింది. తొలి రెండు టెస్టుల్లో విఫలమైన హాండ్స్‌కబ్ స్థానంలో మిచెల్ మార్ష్ టీమ్‌లోకి వచ్చాడు. 

విరాట్ కోహ్లీ (కెప్టెన్), అజింక్య రహానె (వైస్ కెప్టెన్), మయాంక్ అగర్వాల్, హనుమ విహారి, చతేశ్వర్ పుజారా, రోహిత్ శర్మ, రిషబ్ పంత్ (వికెట్ కీపర్), రవీంద్ర జడేజా, మహ్మద్ షమీ, ఇషాంత్ శర్మ, జస్‌ప్రీత్ బుమ్రా