భారత్, ఆస్ట్రేలియా మధ్య జరుగుతోన్న నాలుగు టెస్టుల సిరీస్‌ ఇప్పటికే 1-1 సమమైంది. కాబట్టి మెల్‌బోర్న్‌లో ప్రారంభమైన మూడో టెస్ట్ రెండు జట్లకు ఎంతో కీలకం. ఈ మ్యాచ్‌లో గెలిచిన జట్టు సిరీస్‌లో పైచేయి సాధిస్తుంది. అంతేకాకుండా ఆఖరి టెస్టులో ఆత్మవిశ్వాసంతో ప్రత్యర్థిని ఎదుర్కొంటుంది. అయితే ఈ మూడో టెస్టు కేవలం ఈ రెండు జట్లకే కాదు.. టీమిండియా కెప్టెన్ విరాట్ కోహ్లీకి కూడా ఎంతో కీలకం. ఈ ఏడాదిని అద్భుతంగా ముగించడానికి కోహ్లీకి ఉన్న సువర్ణావకాశం ఈ బాక్సింగ్ డే టెస్ట్. కోహ్లీ ముందు ప్రస్తుతం 10 రికార్డులు ఉన్నాయి. ఈ రికార్డులన్నింటినీ ఈ ఏడాది ముగిసే లోపే బ్రేక్ చేయాల్సి ఉంటుంది. కాబట్టి వీటిని బ్రేక్ చేయాలంటే కోహ్లీకి ఉన్న ఒకే ఒక్క అవకాశం ఈ టెస్ట్. అన్ని ఫార్మాట్లలో కలుపుకొని ఒక ఏడాది అత్యధిక పరుగులు సాధించిన బ్యాట్స్‌మన్‌గా రికార్డు సాధించడానికి కోహ్లీ ఇంకా 134 పరుగులు వెనకబడి ఉన్నాడు. 2018లో ఇప్పటి వరకు కోహ్లీ 2700 పరుగులు చేశాడు. ప్రస్తుతం ఈ రికార్డు రికీ పాంటింగ్ పేరిట ఉంది. రికీ 2005లో 2833 పరుగులు చేశాడు. ఈ బాక్సింగ్ డే టెస్టులో విరాట్ కోహ్లీ సెంచరీ సాధిస్తే సచిన్ టెండూల్కర్ ప్రపంచ రికార్డును సమం చేసినవాడవుతాడు. సచిన్ ఒక ఏడాదిలో (1998లో) 12 సెంచరీలు సాధించాడు. ఈ ఏడాది కోహ్లీ ఖాతాలో ఐదు టెస్టు సెంచరీలు, ఆరు వన్డే సెంచరీలు ఉన్నాయి. ఈ టెస్టులో సెంచరీ సాధించడం ద్వారా కోహ్లీ మరో రికార్డును కూడా సమయం చేసినవాడవుతాడు. ఆస్ట్రేలియాపై సునీల్ గవాస్కర్ 8 టెస్ట్ సెంచరీలు బాదాడు. సచిన్ (11)తరవాత ఆసీస్‌పై అత్యధిక సెంచరీలు సాధించిన భారత బ్యాట్స్‌మన్ గవాస్కర్. ఈ టెస్టులో సెంచరీ చేస్తే గవాస్కర్ రికార్డును కోహ్లీ సమం చేయొచ్చు. ఒక ఏడాదిలో విదేశీ గడ్డపై టెస్టుల్లో అత్యధిక పరుగులు సాధించిన భారత బ్యాట్స్‌మన్‌గా దిగ్గజం రాహుల్ ద్రావిడ్ రికార్డును కూడా కోహ్లీ బ్రేక్ చేసే అవకాశం ఉంది. 2002లో రాహుల్ ద్రావిడ్ విదేశీ గడ్డపై ఆడిన టెస్టుల్లో 1137 పరుగులు సాధించాడు. ఈ ఏడాది కోహ్లీ ఖాతాలో 1112 పరుగులున్నాయి. మరో 36 పరుగులు సాధిస్తే ద్రావిడ్ రికార్డ్ బద్దలైపోతుంది. విదేశీ గడ్డపై ఒక ఏడాది కాలంలో అత్యధిక పరుగులు చేసిన టెస్ట్ కెప్టెన్‌గానూ గ్రేమ్ స్మిత్ రికార్డును బద్దలుకొట్టే అవకాశం కోహ్లీ ముందుంది. స్మిత్ 2008లో 20 ఇన్నింగ్స్‌ల్లో 1212 పరుగులు చేశాడు. దీనికి ప్రస్తుతం కోహ్లీ 109 పరుగుల దూరంలో ఉన్నాడు. ఈ రికార్డును బద్దలుకొడితే విదేశాల్లో ఒక ఏడాదిలో అత్యధిక పరుగులు చేసిన బ్యాట్స్‌మన్‌గానూ కోహ్లీ నిలుస్తాడు. మెల్‌బోర్న్‌లో సెంచరీ సాధిస్తే అత్యధిక సెంచరీలు సాధించిన ఆటగాళ్ల జాబితాలో వెస్టిండీస్ దిగ్గజం గ్యారీ సోబర్స్ సరసన కోహ్లీ నిలుస్తాడు. సచిన్ టెండూల్కర్ అగ్రస్థానంలో కొనసాగుతున్న ఈ జాబితాలో సోబర్స్ 12వ స్థానంలో ఉన్నారు. మెల్‌బోర్న్‌ క్రికెట్ గ్రౌండ్‌లో విరాట్ కోహ్లీ సెంచరీ చేస్తే ఆస్ట్రేలియాలో ఇది అతనికి ఐదో సెంచరీ అవుతుంది. దీంతో ఆస్ట్రేలియా అత్యధిక సెంచరీలు సాధించిన పర్యటక కెప్టెన్‌గా కోహ్లీ రికార్డుకెక్కుతాడు. ప్రస్తుతం క్లైవ్ లాయిడ్ సరసన కోహ్లీ ఉన్నాడు. విరాట్ కోహ్లీ మరో 76 పరుగులు సాధిస్తే ఆస్ట్రేలియా గడ్డపై అత్యధిక పరుగులు సాధించిన రెండో పర్యటక కెప్టెన్‌గా రికార్డుకెక్కుతాడు. ఇప్పటి వరకు ఆస్ట్రేలియాలో కోహ్లీ 673 పరుగులు సాధించాడు. ఈ జాబితాలో క్లైవ్ లాయిడ్ (1301), గ్రేమ్ స్మిత్ (748), ఆర్కీ మెక్‌లారెన్ (709). ఇంకొక్క టెస్టులో భారత్ విజయం సాధిస్తే ఆసియా ఆవల అత్యంత విజయవంతమైన కెప్టెన్‌గా గంగూలీ సరసన కోహ్లీ నిలుస్తాడు. ప్రస్తుతం కోహ్లీ సారథ్యంలోని టీమిండియా ఆసియా బయట 5 విజయాలు అందుకుంది. 6 విజయాలతో అగ్రస్థానంలో ఉన్నాడు. ఇంకొక్క సెంచరీ సాధిస్తే అంతర్జాతీయ క్రికెట్‌లో అత్యధిక సెంచరీలు సాధించిన మూడో బ్యాట్స్‌మన్‌గా కోహ్లీ నిలుస్తాడు. ప్రస్తుతం 63 సెంచరీలతో కుమార సంగక్కర సరసన కోహ్లీ ఉన్నాడు. ఈ జాబితాలో సచిన్ టెండూల్కర్ 100 సెంచరీలతో అగ్రస్థానంలో ఉన్నాడు. రెండో రికీ పాంటింగ్ (71) ఉన్నాడు