వినయ విధేయ రామ’ సందడి షురూ అయ్యింది. ఈ చిత్రంలోని పాటలు కొద్దిసేపటి క్రితం సోషల్ మీడియాలో విడుదల చేయడంతో విధేయ రాముడి పాటలు నెట్టింట్లో సందడి చేస్తున్నాయి. ‘రంగస్థలం’ బ్లాక్ బస్టర్ హిట్ తరువాత రామ్ చరణ్ నటిస్తున్న మూవీ కావడంతో ఈ చిత్రంపై భారీ అంచనాలు ఏర్పడ్డాయి. దీనికి తోడు మాస్ మసాలా యాక్షన్ డైరెక్టర్ బోయపాటి శ్రీను ఈ చిత్రానికి దర్శకత్వం వహించడంతో ఈ అంచనాలు రెట్టింపయ్యాయి. సంక్రాంతి కానుకగా.. జనవరి 11న ప్రేక్షకుల ముందుకు వస్తున్న ఈమూవీ ప్రమోషన్స్‌లో భాగంగా నేడు హైదరాబాద్‌లో ప్రీ రిలీజ్‌ ఈవెంట్‌ను నిర్వహిస్తుండగా.. తాజాగా ఈ మూవీలో పాటల్ని విడుదల చేశారు. రాక్ స్టార్ దేవి శ్రీ ప్రసాద్ ఈ చిత్రానికి మ్యూజిక్ అందించడంతో ఈ చిత్రంలోని పాటల కోసం మ్యూజిక్ లవర్స్ ఎంతగానో ఎదురు చూశారు. తాజాగా విడుదలైన జూక్ బాక్స్‌లో మొత్తం ఐదు పాటలు ఉండగా.. నాలుగు సాంగ్స్‌కి శ్రీమణి సాహిత్యం అందిచగా.. ‘అమ్మా నాన్న’ అనే సాంగ్‌కి రామజోగయ్య శాస్త్రి లిరిక్స్ అందించారు. ఈ మూవీలో రామ్ చరణ్‌కి జోడిగా ‘భరత్ అనే నేను’ బ్యూటీ కైరా అద్వానీ హీరోయిన్‌గా నటిస్తున్నారు. వివేక్ ఒబెరాయ్ ప్రతినాయకుడిగా నటిస్తోన్న ఈ మూవీలో సీనియర్ హీరోయిన్ స్నేహ, ప్రశాంత్, అనన్య, ఆర్యన్‌ రాజేష్‌ తదితరులు కీలక పాత్రలు పోషించారు. హాట్ బ్యూటీ ఇషా గుప్తా స్పెష‌ల్ సాంగ్‌తో అల‌రించనుండగా.. దేవి శ్రీ ప్ర‌సాద్ దరువు వేస్తున్నారు. డీవీవీ దానయ్య ఈ చిత్రాన్ని నిర్మిస్తున్నారు.