ఆంధ్రప్రదేశ్ ప్రభుత్వం ఆరో శ్వేతపత్రాన్ని విడుదల చేసింది. శుక్రవారం (డిసెంబర్ 28)న అమరావతిలోని ప్రజా వేదికలో.. మానవవనరుల అభివృద్ధిపై శ్వేత పత్రాన్ని విడుదల చేశారు. విద్య, వైద్యం, ఆరోగ్యం, కుటుంబసంక్షేమం కోసం అమలు చేసిన పథకాలు, సంస్కరణలను వివరించారు. ఈ సందర్భంగా మాట్లాడిన సీఎం.. . మానవవనరుల విలువను గుర్తించి ప్రాధాన్యత ఇచ్చామని తెలిపారు. విభజన తర్వాత ఏపీలో విద్యాసంస్థలు లేని లోటు ఉందని.. అందుకే నాలుగున్నరేళ్లలో విద్యాభివృద్ధిపై దృష్టిపెట్టామన్నారు. నవ్యాంధ్రకు ప్రపంచంలోని ఉత్తమ వర్సిటీలను ఇక్కడికి తీసుకురావాలని కృషి చేస్తున్నామన్నారు. విద్యార్థులు చదువుకుంటున్న సమయంలోనే ఆవిష్కరణలకు ప్రాధాన్యత ఇచ్చేలా ప్రోత్సహిస్తున్నామని.. జ్ఞానభేరి కార్యక్రమానికి శ్రీకారం చుట్టామన్నారు. ప్రతిభ అవార్డులతో విద్యార్థుల్ని ప్రోత్సహిస్తున్నామని చెప్పారు. నాలెడ్జ్‌ మిషన్‌తో విద్యాసంస్థల్లో అన్ని సదుపాయాలు కల్పించామని చంద్రబాబు తెలిపారు. కాలేజీలకు వైఫై సదుపాయం కల్పించామని.. కొత్తగా యోగా, కూచిపూడి క్లాసులు ఏర్పాటు చేశామన్నారు. రాష్ట్రానికి 11 ప్రైవేట్‌ యూనివర్సిటీలు తీసుకొచ్చామని.. ప్రైవేట్‌ యూనివర్సిటీలతో రూ.12 వేల కోట్ల పెట్టుబడులు పెట్టామన్నారు. విదేశీ సంస్థల ద్వారా స్కిల్‌ డెవలప్‌మెంట్‌లో యువతకు శిక్షణ అందజేశామని చంద్రబాబు పేర్కొన్నారు. నవ్యాంధ్ర నైపుణ్యాభివృద్ధిలో విజయవంతంగా ముందుకు సాగుతోందన్నారు. వైద్య రంగంలో ఎన్నో వినూత్న ఆవిష్కరణలు చేపట్టామని సీఎం చెప్పారు. 24 సేవల్ని అందుబాటులోకి తెచ్చామని.. పుట్టిన బిడ్డను ఇంటికి చేర్చడం నుంచి.. చనిపోయిన వారిని మహా ప్రస్థానానికి చేర్చే వరకు ప్రభుత్వమే సౌకర్యాలు కల్పిస్తుందన్నారు. ఎన్టీఆర్‌ కిట్‌, తల్లీబిడ్డ ఎక్స్‌ప్రెస్‌, చంద్రన్న సంచార చికిత్స, సీఎం ఆరోగ్య కేంద్రాలు లాంటి పథకాలను ప్రవేశపెట్టామన్నారు. ప్రభుత్వ ఆస్పత్రుల్లోనూ గణీయమైన మార్పులు తీసుకొచ్చామన్నారు.