అంతర్జాతీయ మార్కెట్లో ముడిచమురు ధరలు మరోసారి పతనం కావడంతో.. దేశీయంగా పెట్రోలు, డీజిల్ ధరలు తగ్గాయి. దీంతో ఈ ఏడాదిలోనే అత్యంత కనిష్ఠానికి ధరలు పడిపోయాయి. శుక్రవారం (డిసెంబరు 28) దేశ రాజధాని ఢిల్లీలో పెట్రోలు ధర 19 పైసలు తగ్గి రూ.69.55 కి చేరగా.. డీజిల్ ధర 14 పైసలు తగ్గి 63.62 కి చేరింది. ఇక వాణిజ్య రాజధాని ముంబయిలో 18 పైసలు తగ్గిన పెట్రోలు ధర రూ.75.18 కి చేరగా.. డీజిల్ ధర 15 పైసలు తగ్గి రూ.66.57 వద్ద నిలిచింది. ఇక తెలుగు రాష్ట్రాల విషయాన్నికొస్తే.. హైద‌రాబాద్‌లో లీట‌ర్ పెట్రోల్ ధర 20 పైసలు తగ్గి రూ.73.76 వద్ద, డీజిల్ ధర 15 పైసలు తగ్గి రూ.69.14 వద్ద కొనసాగుతోంది. విజయవాడలో లీట‌ర్ పెట్రోల్ ధ‌ర రూ.73.30 ఉండగా, డీజిల్ ధర రూ.68.32 వద్ద కొనసాగుతోంది. డిసెంబరు 25న పెట్రోలు ధరలు ఈ ఏడాదిలో కనిష్ఠ స్థాయికి పడిపోయిన సంగతి తెలిసిందే. ఢిల్లీలో లీటర్ పెట్రోల్‌పై 7 పైసలు తగ్గడంతో లీటర్‌ పెట్రోల్ ధర రూ.69.79కు పడిపోయింది. ఈ ఏడాది జనవరి 4న ఢిల్లీలో లీటర్‌ పెట్రోల్‌ ధర అత్యంత తక్కువగా రూ. 69.97కు అమ్మగా... 25న ఏడాదిలోనే కనిష్ఠానికి పడిపోయింది. ఇక డీజిల్‌ ధర కూడా 9 నెలల కనిష్ఠానికి పడిపోయింది. అయితే ఈ ఏడాదిలో మరో కనిష్ఠాన్ని ఇంధన ధరలు నమోదు చేశాయి. శుక్రవారం లీటర్ పెట్రోలు 14 పైసలు పతనమై ధర రూ.69.55 ల కనిష్ఠాన్ని నమోదుచేసింది. అంతర్జాతీయ మార్కెట్‌లో ముడిచమురు ధరల పతనం కొనసాగుతూనే ఉంది. బ్రెంట్ క్రూడ్ ఆయిల్ ధర బ్యారెల్‌‌ 53.75 డాలర్లకు చేరగా.. డబ్ల్యూటీఐ క్రూడాయిల్ ధర 45.66 డాలర్ల వద్ద కొనసాగుతోంది.