వైఎస్సార్‌సీపీ అధినేత వైఎస్ జగన్మోహన్ రెడ్డి చేపట్టిన ప్రజా సంకల్పయాత్ర చివరి దశకు చేరింది. జనవరి 9న యాత్ర ఇచ్చాపురంలో ముగుస్తుందని పార్టీ ప్రధాన కార్యదర్శి సజ్జల రామకృష్ణారెడ్డి తెలిపారు. ఇచ్చాపురం తో సహా కలసి 134 నియోజకవర్గాలలో 3,500 కిలో మీటర్ల మేర జగన్ పాదయాత్ర చేశారన్నారు. యాత్ర ముగింపునకు సంఘీభావంగా జనవరి 2 నుంచి ప్రత్యేక కార్యక్రమాలు చేపట్టబోతున్నట్లు చెప్పారు. ఐదురోజులపాటు స్థానిక నేతలు నియోజకవర్గాల్లో పర్యటిస్తూ.. ప్రభుత్వ వైఫల్యాలను, వైసీపీ పథకాలను‌ వివరిస్తారని తెలిపారు. ఇచ్చాపురం లో జరిగే ముగింపు సభకు అన్ని నియోజకవర్గాల నేతలు వస్తారన్నారు. ప్రజా సమస్యలను తెలుసుకుంటూ.. ప్రభుత్వ వైఫల్యాలను ఎండగడుతూ పాదయాత్ర కొనసాగిందన్నారు సజ్జల. పాదయాత్రలో ప్రజలు బ్రహ్మరథం పట్టారని.. ఏపీ ప్రజలకు కొత్త ఆశాకిరణం వైఎస్‌ జగన్‌ అన్నారు. రాష్ట్ర విభజన తర్వాత తప్పిదాలు, అసమర్థతతో రాష్ట్ర అభివృద్ధి ఆగిపోయిందని.. 2019 ఎన్నికల్లో అవినీతి పరుల పాలనకు చరమగీతం పాడి ప్రజలు జగన్‌‌ను రాష్ట్రానికి సీఎంగా పట్టంకట్టబోతున్నారని ధీమాను వ్యక్తం చేశారు. పాదయాత్రలో వెళ్లలేని నియోజకవర్గాల్లో కూడా జగన్‌ పర్యటిస్తారని తెలిపారు సజ్జల. త్వరలోనే బస్సు యాత్రను చేపట్టనున్నట్లు చెప్పారు. ఎల్లప్పుడూ ప్రజల మధ్య ఉండటానికే జగన్ ప్రయత్నిస్తున్నారన్నారు. నాలుగున్నరేళ్ల పాలనలో చంద్రబాబు రాష్ట్రానికి చేసిందేమీ లేదన్నారు రామకృష్ణారెడ్డి. త్వరలో ఎన్నికలు వస్తాయని తెలిసి.. ఇప్పుడు హడావిడి మొదలు పెట్టారని విమర్శించారు. తెలంగాణ సీఎం కేసీఆర్‌ ఆంధ్రాలో ప్రచారం చేస్తే ఓట్లు పడతాయని తాము అనుకోవడంలేదని.. ప్రత్యేక హోదాకు ఆయన మద్దతు తెలపడం.. లేఖ రాస్తాననడాన్ని స్వాగతిస్తున్నామన్నారు. చంద్రబాబు అసలు నిజస్వరుపాన్ని ఎవరు బయటపెట్టినా సంతోషిస్తామన్నారు.