ఎన్నికల బరిలోకి దిగుతామని ప్రకటించిన జనసేన అధ్యక్షుడు పవన్‌ కళ్యాణ్‌.. ఆ దిశగా కీలక ప్రకటన చేశారు. 2019లో జరిగే ఎన్నికల ప్రచారానికి శ్రీకారం చుడుతున్నట్లు వెల్లడించారు. విజయవాడ నుంచి తన ఎన్నికల క్యాంపెయిన్ మొదలు పెడుతున్నట్లు ప్రకటించి దూకుడు పెంచారు. నగరంలోని పార్టీ కార్యాలయంలో మంగళవారం జరిగిన నూతన సంవత్సర వేడుకల్లో పవన్ పాల్గొన్నారు. ఈ సందర్భంగా మాట్లాడుతూ ఎన్నికలకు సిద్ధం కావాలని పార్టీ శ్రేణులకు పిలుపునిచ్చారు. ఆంధ్రప్రదేశ్‌కు బంగారు భవిష్యత్తు ఉండాలని పవన్ పేర్కొన్నారు. ‘2019 ఎన్నికల ప్రచారానికి నేడు విజయవాడ నుంచి శ్రీకారం చుడుతున్నాం. ఈ నూతన సంవత్సరంలో ఆంధ్రప్రదేశ్‌కు బంగారు భవిష్యత్తు ఉండాలి. ఆ భవిష్యత్తు, ఏపీ పునర్నిర్మాణంలో జనసేన పార్టీ కీలక పాత్ర పోషించాలి. మనమందరం కష్టపడి పనిచేద్దాం.. జనసేనను గెలిపించుకుందాం. ఇది జరగాలని మనస్ఫూర్తిగా కోరుకుంటున్నా’ అని పవన్‌ చెప్పారు. ఈ సందర్భంగా తమ అభిమాన నేత పవన్ కళ్యాణ్‌కు శుభాకాంక్షలు తెలిపేందుకు నాయకులు, అభిమానులు పోటీపడ్డారు. కొత్త సంవత్సరంలోకి అడుగు పెట్టిన సందర్భంగా పవన్‌ అభిమానులకు సందేశం ఇచ్చారు. ‘గత ఏడాది అనుభవాలను ప్రేరణగా తీసుకుని నూతన నిర్ణయాలతో ముందడుగు వేద్దాం. ఈ కొత్త సంవత్సరంలో సామాన్యుడే రాజై వెలగాలని.. మానవీయ పాలనకు నవ చరిత్రకు ఇది శ్రీకారం కావాలని ఆకాంక్షిస్తున్నా’ అని పవన్‌ పేర్కొన్నారు. ఈ మేరకు జనసేన పార్టీ ట్వీట్లు చేసింది.