ఏపీ సీఎం చంద్రబాబుకు ఓటమి భయం పట్టుకుందని అంటున్నారు సీపీఐ సీనియర్ నేత నారాయణ. వచ్చే ఎన్నికల్లో టీడీపీ ఓటమి ఖరారు కావడంతోనే పవన్‌తో దోస్తీకి పాకులాడుతున్నారని అన్నారు. గత ఎన్నికల్లో పవన్‌ను వాడుకుని అధికారంలోకి వచ్చిన చంద్రబాబు.. ఆ తర్వాత దూరం పెట్టారని ఆరోపించారు. నిన్నటి వరకు పవన్‌ను తిట్టిపోసి ఇప్పుడు ఓ మొహం పెట్టుకుని పొత్తుకు సంకేతాలిస్తున్నారని నిలదీశారు. పవన్‌తో పొత్తు పెట్టుకుంటున్నట్లు సంకేతాలు ప్రజల్లోకి తీసుకెళ్లి లబ్ధి పొందాలని చంద్రబాబు భావిస్తున్నారని మండిపడ్డారు. వచ్చే ఎన్నికల్లో జనసేన, వామపక్షాలు కలిసి 175 నియోజకవర్గాల్లో పోటీ చేస్తాయని నారాయణ తెలిపారు. ప్రధాని మోదీ, భాజపా చీఫ్ అమిత్ షా దేశంలో వ్యవస్థలను భ్రష్టు పట్టిస్తున్నారని నారాయణ ఆరోపించారు. శబరిమల అంశంలో సుప్రీంకోర్టు ఇచ్చిన తీర్పునే ఆ రాష్ట్ర ప్రభుత్వం అమలు చేస్తోందని, దీనిలో విమర్శించడానికి ఏముందని ప్రశ్నించారు. గతంలో శని శింగాపూర్‌ ఆలయంలో కూడా మహిళలకు ప్రవేశం లేదని, ఆ తర్వాత వారిని అనుమతిస్తున్న అంశాన్ని గుర్తు చేశారు. శబరిమల విషయంలో బీజేపీ, ఆర్‌ఎస్‌ఎస్ అనవసర రాద్ధాంతం చేస్తున్నాయని మండిపడ్డారు. రాజకీయ లబ్ధి కోసం ఆలయాలను వాడుకుంటున్నారని విమర్శించారు.