ఆంధ్రప్రదేశ్ ముఖ్యమంత్రి చంద్రబాబు నాయుడికి  నిరసనల సెగ తగిలింది. జన్మభూమి-మా ఊరు కార్యక్రమంలో శుక్రవారం భాగంగా తూర్పుగోదావరి జిల్లా కాకినాడలో పర్యటిస్తున్న ఏపీ ముఖ్యమంత్రి చంద్రబాబునాయుడు కాన్వాయ్‌ని బీజేపీ శ్రేణులు అడ్డుకున్నారు. రాష్ట్ర ప్రభుత్వం చేపడుతున్న పనుల్లో తీవ్రస్థాయిలో అవినీతి జరుగుతోందని ఆరోపిస్తూ జేఎన్టీయూ వద్ద బీజేపీ కార్యకర్తలు ఆయన బస్సును అడ్డుకున్నారు. ప్రభుత్వానికి వ్యతిరేకంగా నినాదాలు చేశారు. బీజేపీ కార్యకర్తల తీరుతో చంద్రబాబుకు చిర్రెత్తుకొచ్చింది. దీంతో బస్సు నుంచి బయటకు వచ్చి ఆందోళనకారులపై తీవ్రంగా మండిపడ్డారు. ‘మీకు కొంచెమైనా సిగ్గుందా... రాష్ట్రంపై కమిట్‌మెంట్ ఉందా? నరేంద్రమోదీ చేస్తున్న పనులకు మీరంతా సిగ్గుపడాలి. మోదీ పేరు చెప్పుకుంటూ తిరిగితే ప్రజలు మిమ్మల్ని కొడతారు. రాష్ట్రాన్ని, దేశాన్ని మోదీ ముంచేశాడు. న్యాయం చేయమని అడిగినందుకు దిల్లీలో మనవారిపై లాఠీఛార్జి చేశారు. మన గడ్డపై ఉంటూ, మన నీరు తాగుతూ మోదీకి సపోర్ట్ చేయడానికి మీకు సిగ్గుండాలి’ అంటూ చంద్రబాబు బీజేపీ శ్రేణులపై మండిపడ్డారు. ఇలాగే వ్యవహరిస్తే కఠిన పరిణామాలు ఎదుర్కోవాల్సి వస్తుందని హెచ్చరించారు. ఆందోళనకారులను పోలీసులు అక్కడి నుంచి తరలించడంతో చంద్రబాబు తన పర్యటన కొనసాగించారు. Learnmore